Elísabet Einarsdóttir, framkvæmdastjóri BBA//Fjeldco, segir lögmannsstofuna fara nokkuð óhefðbundnar leiðir í rekstri miðað við lögmannsstofur almennt. BBA//Fjeldco leggi mikið upp með að veita teymi sínu hlutdeild í afkomu sem virðist hafa tekist vel.
Í ársreikningi stofunnar segir að þrátt fyrir áhrif Covid-19 faraldursins á efnahagslífið síðastliðin ár hafi rekstur BBA//Fjeldco haldist stöðugur. Stjórn félagsins greiddi 408 milljónir í arð til hluthafa í fyrra sem voru fjórtán í árslok.
„Við erum ánægð með stöðuna hjá okkur í ár og það lítur út fyrir að tekjur séu enn að aukast, en það var umtalsverð tekjuaukning á milli ára hjá okkur í fyrra eða um 12% frá árinu 2021,“ segir Elísabet en rekstrartekjur BBA// Fjeldco voru 1,2 milljarðar í fyrra.
Elísabet Einarsdóttir, framkvæmdastjóri BBA//Fjeldco, segir lögmannsstofuna fara nokkuð óhefðbundnar leiðir í rekstri miðað við lögmannsstofur almennt. BBA//Fjeldco leggi mikið upp með að veita teymi sínu hlutdeild í afkomu sem virðist hafa tekist vel.
Í ársreikningi stofunnar segir að þrátt fyrir áhrif Covid-19 faraldursins á efnahagslífið síðastliðin ár hafi rekstur BBA//Fjeldco haldist stöðugur. Stjórn félagsins greiddi 408 milljónir í arð til hluthafa í fyrra sem voru fjórtán í árslok.
„Við erum ánægð með stöðuna hjá okkur í ár og það lítur út fyrir að tekjur séu enn að aukast, en það var umtalsverð tekjuaukning á milli ára hjá okkur í fyrra eða um 12% frá árinu 2021,“ segir Elísabet en rekstrartekjur BBA// Fjeldco voru 1,2 milljarðar í fyrra.
Aðlaga reksturinn að markaðnum hverju sinni
„Markmið okkar undanfarin ár hefur verið að vaxa jafnt og þétt. Þá hefur vöxtur síðustu ár í raun verið meiri en við ráðgerðum samhliða aukinni eftirspurn. Þetta ár hefur farið vel af stað og viðskiptavinum stofunnar fjölgar áfram, en samhliða tekjuaukningu erum við, líkt og öll innlend fyrirtæki, að takast á við aukinn kostnað.“
Spurð um hvort núverandi efnahagsástand hafi áhrif á reksturinn, segir Elísabet stofuna aðlagast hverju sinni.
„Við tökum alltaf samtalið þegar breytingar verða á efnahagsástandi og spyrjum hvaða áhrif þetta hefur á okkur, reynum að grípa hratt til aðgerða og aðlaga reksturinn að markaðnum eins og hann er hverju sinni.“
Meira um samruna og yfirtökur hávaxtaumhverfi
Bjarki H. Diego, einn eigenda og meðlimur í þriggja manna framkvæmdastjórn, segir að þrátt fyrir að verðbréfamarkaðir hafi verið erfiðir í ár þá sé staða íslensks efnahagslífs í grunninn góð.
„Sem segja má að sé bæði gott og vont, þar sem það kann að leiða til þess að vextir lækki ekki í náinni framtíð hér á landi líkt og erlendis,“ segir Bjarki.
„Hátt vaxtaumhverfi hefur leitt til þess að það er minna að gera en áður í fjármögnunarverkefnum, þar sem fyrirtæki eru eðli málsins samkvæmt síður að endurfjármagna sig. Á móti hefur verið meira um samruna og yfirtökur, en við höfum unnið að mörgum stórum kaup- og sameiningarverkefnum undanfarið,“ segir Bjarki.
„Vonast til þess að fjárfestingar Íslendinga erlendis aukist“
BBA//Fjeldco rekur einnig skrifstofu í London og að sögn Bjarka hafa starfsmenn þar tekið þátt í kaup- og sameiningarverkefnum í auknum mæli og stofan notið afar góðs af reynslu og þekkingu þeirra á þessum sviðum.
„Samþætting skrifstofu okkar í London við starfsemina hér á landi hefur reynst einstaklega vel.“ Elísabet tekur í sama streng og segir að mesti vöxturinn hafi verið í London síðastliðin tvö ár.
„Við erum að vonast til þess að fjárfestingar Íslendinga erlendis aukist á ný, en undanfarin ár höfum við unnið mun meira við að veita ráðgjöf til erlendra aðila sem fjárfest hafa hér á landi,“ segir Bjarki en reynslan sýni að gengi krónunnar skiptir þar máli.
„Þegar krónan veikist þá verðum við vör við aukinn áhuga erlendra aðila á fjárfestingum á Íslandi.“ Gengi krónunnar hefur verið sterkt í ár en hefur verið að veikjast sérstaklega gagnvart Bandaríkjadal seinni hluta árs.
„Við sjáum því fyrir okkur að áhugi erlendra fjárfesta á fyrirtækjum hér heima muni aukast, enda fjölmörg frábær fjárfestingartækifæri hér á landi. Nýjasta og þekktasta dæmið er auðvitað Kerecis, en BBA// Fjeldco veitti kaupendum lögfræðilega ráðgjöf við kaup á fyrirtækinu,“ segir Bjarki.
BBA//Fjeldco sér fyrir sér að fjárfestingar komi til með að aukast í gegnum skrifstofuna í London og þegar fram líða stundir muni íslensk fyrirtæki og fjárfestar leita að fjárfestingartækifærum erlendis í auknum mæli.
„Lánskjör hjá íslenskum fjármálafyrirtækjum í erlendri mynt eru hins vegar engan veginn samkeppnishæf, eins og sakir standa, og sjáum við því ekki fyrir okkur að íslenskir fjárfestar muni leita fjárfestingartækifæra erlendis í auknum mæli fyrr en íslensk fjármálafyrirtæki fá betri lánakjör á erlendum mörkuðum. Sem mun gerast,“ segir Bjarki.
Nánar er fjallað um málið í blaðinu Fyrirmyndarfyrirtæki í rekstri, sem fylgir Viðskiptablaðinu. Blaðið er opið öllum og hægt er að skoða það hér.
