Styrkás ehf., félag í 69,64% eigu SKEL fjárfestingafélags hf., undirritaði í dag samkomulag um helstu skilmála kaupsamnings vegna kaupa á 100% hlutafjár í sex dótturfélögum Máttarstólpa ehf.
Þetta kemur fram í Kauphallartilkynningu frá Skel en félögin sex eru:
- Stólpi Gámar ehf., kt. 4601211590, Klettagörðum 5, 104 Reykjavík;
- Stólpi Smiðja ehf., kt. 4601211750, Klettagörðum 5, 104 Reykjavík;
- Klettaskjól ehf., kt. 4601210510, Klettagörðum 5, 104 Reykjavík;
- Stólpi ehf., 460121-0430, Klettagörðum 5, 104 Reykjavík;
- Tjónaþjónustan ehf., kt. 460121-1670, Klettagörðum 5, 104 Reykjavík;
- Alkul ehf., kt. 491020-0830, Haukdælabraut 48, 113 Reykjavík;
Heildarvirði 3,5 milljarðar
Í tilkynningu segir að félögin sex verði sem fyrr rekin á samstæðugrunni.
Heildarvirði hins selda samkvæmt samkomulagi er samtals 3.548 milljónir króna. Að frádregnum áætluðum yfirteknum skuldum nemur kaupverð eigin fjár hins selda 2.970 milljónum króna.
Við afhendingu hins selda verður 55% af kaupverði eigin fjár hins selda greitt með reiðufé og 45% greitt með seljendaláni og nýjum hlutum í Styrkási.
„Með kaupum á Stólpa Gámum og tengdum félögum er mikilvægt skref stigið til að útvíkka þjónustu Styrkáss og byggja upp þriðja kjarnann í rekstri félagsins. Stólpi Gámar er leiðandi í gáma- og húseiningalausnum fyrir atvinnulífið og einstaklinga, gámaviðgerðum og tjónaþjónustu fyrir tryggingafélög. Mikil tækifæri eru til staðar til að byggja ofan á þann góða rekstur sem Ásgeir Þorláksson og samstarfsfólk hans hefur byggt upp og auka enn frekar þjónustu við viðskiptavini,” segir Ásmundur Tryggvason í tilkynningunni.
Samkomulagið er gert með fyrirvara um að aðilar nái saman um endanlegan kaupsamning vegna viðskiptanna, fjármögnun, niðurstöðu áreiðanleikakannana og samþykki Samkeppniseftirlits.
Ásmundur Tryggvason var ráðinn forstjóri Styrkáss í byrjun október en Styrkás er nýlegt þjónustufyrirtæki sem í dag samanstendur af Skeljungi og Kletti.
Samhliða ráðningunni tilkynnti félagið um markmið sín að innri og ytri vexti Styrkáss með því að útvíkka og efla þjónustu við atvinnulífið á sviði orku og efnavöru, tækja og búnaðar, umhverfis, iðnaðar og eignaumsýslu.
Á markað fyrir árslok 2027
Í hálfsársuppgjöri Skeljar kom fram að Horn IV slhf., sem er framtakssjóður í stýringu Landsbréfa, hafi tekið þátt í hlutafjáraukningu í Styrkási að upphæð 3,5 milljarða króna og varð Styrkás í kjölfarið eignarhaldsfélag um allt hlutafé í Skeljungi og Kletti – sölu og þjónustu.
Styrkás er nú í 69,64% eigu SKEL fjárfestingarfélags hf. og 29,54% eigu Horns IV slhf., framtakssjóðs í stýringu Landsbréfa.
Markmið hluthafa er að skrá alla hluti í félaginu á skipulegan markað í Kauphöll Íslands fyrir árslok 2027.
„Stólpi ehf. hóf starfsemi sína 1974. Ég tók við sem aðaleigandi og framkvæmdastjóri félagsins af föður mínum árið 1999 og síðan hafa önnur félög bæst við samstæðuna. Nú er komið að því að aðrir taki við keflinu og leiði áframhaldandi uppbyggingu félagsins. Ég er sannfærður um að framtíðin sé björt enda hefur félagið á að skipa úrvals hópi starfsfólks og býr að traustum viðskiptasamböndum til áratuga. Áfram verð ég þátttakandi í vegferð félagsins sem hluthafi í Styrkási og hlakka til samstarfsins við nýja eigendur,” segir Ásgeir Þorláksson, stjórnarformaður og eigandi Máttarstólpa.
