Ríkissjóður Íslands gaf í dag út skuldabréf að fjárhæð 750 milljónir evra, jafnvirði um 109 milljarða króna.
Andvirði útgáfunnar verður varið í að styrkja gjaldeyrisforða Seðlabanka Íslands og endurfjármagna útistandandi evrubréf, að því er kemur fram í tilkynningu frá Lánamálum ríkisins.
Sexföld eftirspurn
Skuldabréfin bera 2,625% fasta vexti og voru gefin út til 5 ára á ávöxtunarkröfunni 2,672%. Í tilkynningunni segir að vaxtakjör ríkissjóðs í þessu útboði séu umtalsvert betri en í síðustu útgáfu.
Bent er á að útgáfur ríkissjóðs séu verðlagðar með hliðsjón af millibankavöxtum (Mid-swap rate). Álagið á millibankavexti nú sé 42 punktar, en var 95 punktar í grænu útgáfu ríkissjóðs á síðasta ári sem var til 10 ára.
Þá segir að álagið á ríkissjóð hafi farið lækkandi þrátt fyrir óvissu í alþjóðlegum efnahagsmálum og jafnvel batnað meira en hjá sambærilegum útgefendum með svipað lánshæfismat.
„Það er mjög ánægjulegt að sjá hinn mikla áhuga sem fjárfestar sýna útgáfu ríkissjóðs og þau bættu kjör sem erum að ná að þessu sinni,” segir Daði Már Kristófersson fjármálaráðherra.
Heildareftirspurn nam um 4,4 milljörðum evra eða um 638 milljörðum króna, sem samsvarar tæplega sexfaldri fjárhæð útgáfunnar.
Fjárfestahópurinn, sem taldi rúmlega 100 aðila, samanstendur af eignastýringarsjóðum, bönkum, seðlabönkum, lífeyrissjóðum, tryggingafélögum og öðrum fagfjárfestum, aðallega frá Evrópu.
Daði Már segir útgáfan hafa náð nær því markmiði að breikka fjárfestahópinn í skuldabréfum ríkissjóðs.
„Útgáfan nú er í samræmi við þá stefnu í lánamálum ríkissjóðs og miðar að því að ríkissjóður sé reglulegur útgefandi á alþjóðamörkuðum. Sagan sem við höfum að segja þykir góð í samanburði við það sem margar aðrar þjóðir eru að glíma við; góður hagvöxtur og hagvaxtarhorfur, lækkandi verðbólga, aukin fjölbreytni í útflutningi og sjálfbærni og bætt lánshæfismat," segir Daði Már.
Umsjón útgáfunnar var í höndum Citibank, Barclays Bank, JP Morgan og BNP Paribas.
Samhliða tilkynningu um útboð á nýju skuldabréfi var tilkynnt um að ríkissjóður gerir tilboð í endurkaup á útistandandi skuldabréfi í evrum sem er á gjalddaga á næsta ári. Tilboðið stendur til föstudagsins 23. maí.
