Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi (SFS), lýsti því í Þjóðmálum í síðustu viku að nálgun SA í kjarasamningum hefði beðið skipsbrot og að henni hefði ekki dottið í hug að samþykkja samningana.
Í viðtali í Viðskiptablaðinuer Sigríður Margrét Oddsdóttir, framkvæmdastjóri SA, í viðtali. Spurð hvort samstaða sé innan Samtaka atvinnulífsins með samningana sem undirritaðir voru á síðasta ári svarar hún: „Á stóru heimili eru skiptar skoðanir, í því felst styrkur stórra og mikilvægra samtaka,“ segir Sigríður Margrét.
„Samningarnir voru samþykktir með miklum meirihluta greiddra atkvæða eða 96,32%, einungis 0,47% félagsmanna greiddu atkvæði á móti samningunum og 3,21% tóku ekki afstöðu til þeirra. Kosningaþáttakan var góð eða um 85% samkvæmt atkvæðaskrá og kosningaþátttaka félagsmanna Samtaka fyrirtækja í sjávarútvegi var ekki síðri en félagsmanna annarra aðildarsamtaka. Þetta er leynileg kosning og því er ekki unnt að greina niðurstöður eftir aðildarsamtökum en ef við gefum okkur að allir þeir sem sögðu „nei“ við kjarasamningunum væru frá SFS þá væri það innan við 3% af þeirra atkvæðamagni."
„Það umhverfi kjarasamninga sem við höfum starfað innan undanfarna áratugi hefur leitt af sér launahækkanir umfram það sem er innistæða fyrir og enn fremur mikið ójafnvægi í launastefnunni, mikla áherslu á hækkanir lægstu launataxta.
Það er eðlilegt að horft sé til þess með hvaða hætti gera megi ferli við gerð kjarasamninga skilvirkara. Það er ekki bara hjá ríkinu sem laun vega þungt í rekstrinum. Laun eru gjarnan stærsti einstaki kostnaðarliður fyrirtækja að aðföngum undanskildum, það má ekki gleyma því að um 60% allra verðmæta sem við sköpum á landinu renna til launafólks.“
Ekki ný sjónarmið
Sigríður Margrét segir að þó tekin hafi verið mikilvæg skref í rétta átt í nýgerðum kjarasamningum þá sé svo sannarlega svigrúm til umbóta.
„Við eigum eftir að sjá árangur af breyttu vinnulagi. Við þurfum að sjá stjórnvöld stíga mikilvæg skref og það má ekki gleyma því að launaskrið mun hafa áhrif á endanlega niðurstöðu.
Kjarasamningarnir voru gerðir að vel ígrunduðu máli. Haustið áður en þeir voru undirritaðir fórum við hjá samtökunum í hringferð um allt landið og héldum vinnufundi með félagsmönnum, þar sem við kölluðum eftir áherslum í kjarasamningum."
„Til að tryggja rétt samningsmarkmið framkvæmdum við enn fremur könnun á meðal bæði félagsmanna Samtaka atvinnulífsins og almennings. Við heldum tug félagsfunda á meðan á kjaraviðræðum stóð og á annan tug stjórnarfunda auk þess sem stjórnarmenn samtakanna, formenn aðildarsamtaka og framkvæmdastjórar tóku beinan þátt í viðræðunum í Karphúsinu.
Samtök fyrirtækja í sjávarútvegi tóku þátt í þessari vinnu rétt eins og aðrir, þau sjónarmið sem hafa komið fram undanfarið eru því ekki ný af nálinni, enda er styrkur af því að fá ólík sjónarmið að borðinu og takast á með málefnalegum hætti.“
Ítarlegt viðtal er við Sigríði Margréti í Viðskiptablaðinu, sem var að koma út. Áskrifendur geta lesið það í heild hér.
