Hlutabréf í bandarískum matvælaframleiðendum hafa tekið högg frá því að Donald Trump var kjörinn forseti Bandaríkjanna.
Samkvæmt The Wall Street Journal má rekja lækkunina til tilnefningar Trumps á Robert F. Kennedy Jr. sem næsta heilbrigðisráðherra Bandaríkjanna.
Kennedy hefur opinberlega sagst ætla að draga úr sykri og öðrum gerviefnum í matvörum sem eru framleiddar í Bandaríkjunum en stór hluti heilbrigðisvanda Bandaríkjanna má rekja til mataræðis.
Frá því að Trump var kjörinn hefur gengi matvælaframleiðandanna Kraft Heinz, General Mills og Campell Soup lækkað um 7% að meðaltali.
Hlutabréf í Coca Cola hafa lækkað um 4,5% síðastliðinn mánuð á meðan hlutabréf í PepsiCO hafa lækkað um 5,7%.
Ef Kennedy verður næsti heilbrigðisráðherra Bandaríkjanna getur hann samkvæmt The Wall Street Journal mjög auðveldlega hafist handa við að tækla aukaefni í bandarískum matvælum.
Heilbrigðisráðherra getur beint því til lyfja- og matvælaeftirlits Bandaríkjanna (FDA) að taka harðar á gerviefnum, litarefnum og sætuefnum og skikkað fyrirtæki til að þurfa gera betur grein fyrir þeim á vörum sínum eða bannað þau.
Stóru matvælafyrirtækin í Bandaríkjunum hafa þó tekið marga slagi við FDA í gegnum tíðina og hafa þau verið fljót að aðlaga sig breyttum reglum t.d. þegar eftirlitið fór á eftir transfitusýrum í matvælum árið 2015.
Að mati WSJ mun stefnubreyting Kennedy, verði hann ráðherra, hafa áhrif á tekjustreymi stórfyrirtækjanna en þó ekki að því leyti að þau muni ekki ráða við það.
