Hexatronic Group hefur undirritað viljayfirlýsingu um að kaupa hluta af Endor, sem er í eigu Sýnar og starfar m.a. á sviði þjónustu við gagnaver. Þetta kemur fram í Kauphallartilkynningu frá Sýn.
Sýn keypti íslenska upplýsingatæknifyrirtækið Endor, sem sér um að reka og stýra ofurtölvum og tengdum þjónustum í Svíþjóð, Noregi, Þýskalandi og víðar, árið 2019.
Í nóvember 2022 ákvað Sýn að gefa Endor aukið vægi í starfsemi Sýnar og gerður var sérstakur þjónustusamningur milli félaganna til þess að hafa jákvæð áhrif á tekjur og afkomu Endor.
„Starfsemin sem við erum að kaupa snýr að samþættum upplýsingatæknilausnum fyrir stærri fyrirtæki og stofnanir sem vinna með sívaxandi magn af gögnum. Þetta er spennandi hluti markaðarins og með þessum kaupum erum við að efla okkar framboð í upplýsingatæknibúnaði og þjónustu“ segir Martin Åberg, aðstoðarforstjóri Hexatronic, í tilkynningunni.
Samkvæmt Sýn er þetta liður í stefnu félagsins sem snýr að því að auka skilvirkni í samstæðunni með áherslu á kjarnastarfsemi.
Stjórn Sýnar ákvað nýverið að birta afkomuspá fyrir árið en félagið hafði ákveðið í febrúar að láta þá iðju vera vegna óvissu um framtíðareignarhald vefmiðla og útvarpsstöðva.
Sýn gerir ráð fyrir að heildarumfang hagræðinga sem félagið er að fara í muni bæta reksturinn og skila um 600 til 800 milljónum króna betri afkomu og rekstrarhagnaði (EBIT) á bilinu 1,5 til 1,7 milljörðum.
„Það er ánægjulegt að hafa svona sterkan aðila til að taka við kyndlinum við að leiða þróun lausna fyrir gagnaver og háhraða tölvuklasa. Viðskiptin snerta aðallega alþjóðlega starfsemi Endor og stóra innlenda viðskiptavini sem nýta sérhæfðar samþættar lausnir. Innlendir viðskiptavinir Endor munu því áfram vera þjónustaðir af Endor ehf. að mestu leyti. Við vonum að þessi vegferð og framtíðarsamstarf við Hexatronic muni frekar styrkja lausnamengi okkar fyrir viðskiptavini Endor“ segir Herdís Dröfn Fjeldsted, forstjóri Sýnar.
