Sýn hf. gerir ráð fyrir að rekstrarhagnaður félagsins (EBIT) fyrir árið 2024 verði um 700 milljónir króna, sem er verulega undir áður útgefnum spám.
Fyrri áætlanir félagsins gerðu ráð fyrir að EBIT myndi liggja á bilinu 900 til 1.100 milljónir króna, en í uppfærðri spá frá síðasta hausti var gert ráð fyrir að hagnaðurinn myndi nálgast neðri mörk þess bils.
Samkvæmt Kauphallartilkynningu Sýnar koma þessi frávik til vegna verulegrar lækkunar auglýsingatekna, samdráttar í áskriftartekjum sjónvarps, minni eignfærslna á launakostnaði og óvæntu tjóni vegna eldsvoða sem hafði veruleg áhrif á rekstur félagsins.
Endurmat á framtíðartekjum
Sala auglýsinga reyndist mun minni en gert var ráð fyrir í upphaflegum áætlunum.
Tekjur af auglýsingasölu voru 258 milljónum króna undir væntingum á síðustu tveimur fjórðungum ársins, þar af nam tekjuskerðingin 157 milljónum króna á fjórða ársfjórðungi.
Þessi þróun leiddi til endurmats á áætluðum framtíðartekjum af þessum rekstrarþætti. Samhliða því voru áskriftartekjur af sjónvarpsmiðlum einnig undir væntingum og vantaði 106 milljónir króna upp á markmið félagsins á því sviði.
Auk þess hafði breytt eignfærslustefna áhrif á afkomu félagsins, þar sem tekin var ákvörðun um að eignfæra minna af launakostnaði en áður hafði verið áætlað.
Mismunurinn vegna þessara breytinga nemur 112 milljónum króna. Þótt um sé að ræða bókhaldslega ákvörðun frekar en raunverulegt útstreymi fjár er það engu að síður þáttur sem vegur þungt í lokaniðurstöðunni.
Það sem þó hafði mest áhrif á rekstrarniðurstöðuna var óvænt tjón vegna eldsvoða sem varð um mánuði eftir útgáfu síðustu rekstrarspár félagsins.
Tjónið hefur nú verið metið á um 600 milljónir króna en samþykkt bótaupphæð frá tryggingafélagi nemur aðeins 207 milljónum króna.
Eldsvoðinn hefur því haft umtalsverðan kostnað í för með sér og kallar jafnframt á auknar fjárfestingar til endurnýjunar á skemmdum búnaði, sem mun hafa áframhaldandi áhrif á fjárhag félagsins á komandi mánuðum.
Afkomuspá 2025 lækkuð
Þrátt fyrir þessar áskoranir hefur rekstur fjarskipta verið í samræmi við áætlanir og markmið félagsins um aukna skilvirkni í rekstri haldið sér, samkvæmt félaginu.
Rekstrarkostnaður hefur þróast í takt við væntingar og ekki farið fram úr áætlunum, sem hefur dregið úr neikvæðum áhrifum annarra þátta.
Í ljósi ofangreindra frávika mun Sýn þurfa að endurskoða áður gefnar spár um EBIT fyrir árið 2025 til lækkunar. Félagið mun kynna uppfærðar horfur fyrir árið 2025 samhliða birtingu endanlegs ársuppgjörs þann 20. febrúar næstkomandi.
Ársuppgjör félagsins fyrir 2024 er enn í vinnslu og geta endanlegar niðurstöður tekið breytingum fram að þeim tíma.
