Landsbankinn tilkynnti í morgun um að hann hefði hækkað vexti verðtryggðra íbúðalána. Hinir stóru viðskiptabankarnir tveir, Arion banki og Íslandsbanki, tilkynntu einnig um hækkun á vaxtakjörum verðtryggðra húsnæðislána fyrr í mánuðinum.
„Samhliða þessum vaxtabreytingum taka gildi breytingar á framboði verðtryggðra íbúðalána og verða verðtryggð íbúðalán með jöfnum greiðslum nú eingöngu í boði fyrir fyrstu kaupendur,“ segir í tilkynningu á vef Landsbankans. Engar breytingar verða á framboði verðtryggðra lána með jöfnum afborgunum.
Landsbankinn hækkaði breytilega vexti verðtryggðra íbúðalána um 0,25 prósentustig og fasta vexti á nýjum verðtryggðum íbúðalánum til 60 mánaða um 0,50 prósentustig.
Bankinn lækkaði hins vegar fasta vexti á nýjum óverðtryggðum íbúðalánum til 36 og 60 mánaða. Vextirnir lækka um 0,20 prósentustig. Eins lækkuðu fastir vextir bankans á óverðtryggðum útlánum vegna bíla- og tækjafjármögnunar um 0,20 prósentustig.
Breytingarnar tóku gildi í dag.
Þá hækkaði bankinn einnig breytilega vexti á verðtryggðum innlánsreikningum um 0,25 prósentustig, auk þess sem vextir á gjaldeyrisreikningum taka breytingum með hliðsjón af vaxtastigi viðkomandi myntar.
