Heildartekjur Nova Klúbbsins hf. á fyrstu sex mánuðum ársins jukust um 4,7% frá fyrra ári og námu samtals 6,4 milljörðum króna, samkvæmt árshlutauppgjöri fyrirtækisins.
EBITDA nam 1,9 milljörðum króna samanborið við 1.6 milljarða á sama tímabili í fyrra. EBITDA hlutfallið var 30,0% á fyrstu sex mánuðum ársins og vex úr 26,9% á fyrra ári. Rekstrarhagnaður (EBIT) var 872 milljónir króna en var 683 milljónir á sama tímabili á fyrra ári og vex þannig um 27,7% milli ára.
Hagnaður Nova á fyrstu sex mánuðum ársins var 280 milljónir króna.
Þjónustutekjur Nova námu samtals 4,8 milljörðum króna á fyrstu sex mánuðum ársins og vaxa um samtals 398 milljónir sem er 9,0% vöxtur á milli ára.
Lykillinn að ánægju viðskiptavina er ánægt starfsfólk
„Þessi vöxtur skýrist fyrst og fremst af áframhaldandi fjölgun viðskiptavina bæði í farsíma- og netþjónustu sem og aukningu í reikitekjum af ferðamönnum. Áfram er góður EBITDA vöxtur á milli ára, og eykst hún um 16,7% frá fyrra ári. Tekjur af vörusölu dragast saman um 142 m.kr,“ segir í uppgjörinu.
„Árið er hálfnað, staðan í hálfleik er góð og rekstrarniðurstaða annars ársfjórðungs er samkvæmt okkar áætlun. Sem fyrr er dansinn taktfastur, viðskiptavinum fjölgar á dansgólfinu og samkeppnin er mikil um dansfélaga sem gerir leikinn enn skemmtilegri. Við viljum halda áfram að leggja okkur fram við að efna loforð okkar um að viðskiptavinir fái alltaf mest fyrir peninginn hjá Nova, bæði með því að skora á okkur sjálf og samkeppnina.
Lykillinn að ánægju viðskiptavina er ánægt starfsfólk og við hjá Nova höfum haft fjölbreytni liðsins okkar í fyrirrúmi enda erum við þeirrar skoðunar að það sé forsenda fyrir góðum árangri. Við erum ótrúlega stolt af því að hafa verið útnefnd Fyrirtæki ársins fjórða árið í röð og verið fyrirmyndarfyrirtæki af hálfu VR frá því fyrirtækið var stofnað.
Nova vill vera fyrst inn í framtíðina með snjallar lausnir og hefur verið leiðandi í innviðauppbyggingu farsímanets á Íslandi. Við viljum þannig tryggja besta netsambandið með mikilli afkastagetu og góðri upplifun notenda. Uppbygging 5G er samkvæmt áætlun og þar ætlum við að halda áfram markvissri uppbyggingu. Við erum gríðarlega spennt fyrir næstu kynslóð 5G, en við erum meðal þeirra fyrstu í Evrópu sem hefja tilraunir á nýrri tækni,” segir Margrét Tryggvadóttir, skemmtana- og forstjóri Nova í uppgjörinu.
