Þegar litið er um öxl blasa við stórfenglegar breytingar á íslenskri samfélagsgerð á þeim rúmlega 30 árum sem liðin eru síðan Viðskiptablaðið hóf göngu sína. Á eftirhrunsárunum staldra vafalaust flestir við bóluna og bankahrunið í því samhengi, en menn skyldu ekki gleyma því að árin þar á undan höfðu ekki síður átt sér stað mögnuð vatnaskil. Er síga fór á seinni hluta níunda áratugarins leið Kalda stríðið undir lok, en það var ekki aðeins í Sovétríkjunum sálugu, sem menn fengu að kynnast perestrojku. Hér á Íslandi blésu ferskir vindar í efnahags- og atvinnulífi, þar sem margs konar höftum var aflétt, hið opinbera dró sig úr samkeppnisrekstri, losaði um eignir og dregið var úr margháttaðri ríkisforsjá, sem hafði mótað samfélagið allt um áratugaskeið.
Um það leyti sem Viðskiptablaðið var fyrst gefið út var athafnalífið farið að taka duglega við sér og þess sá skjótt stað í ýmsum hagstærðum. En um leið áttu sér stað ýmsar breytingar aðrar, sem sumar mátti rekja til hinna nýju tíma með beinum eða óbeinum hætti, meðan aðrar áttu sér aðrar og dýpri rætur.
Á þessum tíma hefur Íslendingum þannig fjölgað um rúmlega 124 þúsund manns, en um leið hefur meðalaldurinn hækkað um rúmlega fimm ár. Þá hefur það breyst á síðastliðnum þremur áratugum, að fólk af erlendum uppruna hefur margfaldast. Íslendingar vinna að meðaltali vinnuviku sem er rúmlega sex klukkustundum styttri en árið 1994. Þá hefur fólki á vinnumarkaði fjölgað um rúmlega 89 þúsund einstaklinga og munar víst um minna.
Umfjöllunin birtist fyrst í 30 ára afmælistímariti Viðskiptablaðsins.
