Kísilver PCC á Bakka var rekið með um þriggja milljarða króna tapi á síðasta ári eftir um sjö milljarða tap árið 2020. Rekstrarhagnaður hefur þó verið hjá félaginu frá því í september vegna sögulega hás heimsmarkaðsverðs á kísilmálmum.

Í ársskýrslu þýska móðurfélagsins PCC SE, sem á 86,5% í PCC á Bakka, er bent á að kísilverð hafi um tíma verið fimmfalt hærra í fyrra en í nóvember árið 2020 og reksturinn hafi því gengið framar vonum. Rekstrartekjur kísilvers PCC á Bakka námu ríflega sex milljörðum króna í fyrra miðað við rúmlega þrjá milljarða króna árið 2020 samkvæmt ársskýrslu PCC SE.

Kísilverið var einungis rekið hluta af árinu bæði árin. Kísilverið á Bakka var gangsett í apríl 2018 en tíðar bilanir einkenndu reksturinn í upphafi.

Eftir að heimsfaraldurinn braust út árið 2020 hríðféll verð á kísil og öðrum hrávörum sem varð til þess að kísilverinu á Bakka var lokað tímabundið sumarið 2020. Þá var um 80 af 130 starfsmönnum sagt upp en á meðan var unnið að endurbótum á verksmiðjunni. Í byrjun árs 2021 tók hrávöruverð hins vegar að rísa og kísilverið var gangsett á ný vorið 2021.

Stækkun kísilversins aftur til skoðunar

Til skoðunar er að stækka kísilverið vegna hás kísilverðs.