Festi og Hagar, eigendur Olíudreifingar, hefur borist óskuldbindandi tilboð í innviðafélagið. Smásölufyrirtækin hafa lagt mat á tilboðin og ákveðið að bjóða þremur aðilum að halda áfram í söluferlinu og veita þeim aðgengi að frekari upplýsingum.
Þetta kemur fram í tilkynningum Festi og Haga til Kauphallarinnar. Festi, sem er móðurfélag N1, á 60% hlut í Olíudreifingu, og Hagar, móðurfélag Olís, á 40% hlut í innviðafélaginu.
„Ekki liggur fyrir nein vissa á þessu stigi hvort framangreint ferli muni leiða til skuldbindandi tilboða í Olíudreifingu, sem gæti lokið með sölu á félaginu,“ segir í tilkynningum Haga og Festi.
Félögin hófu í lok september formlegt söluferli á Olíudreifingu. Fyrirtækjaráðgjöf Íslandsbanka um söluferlið.
Velta Olíudreifingar nam tæplega 5,5 milljörðum króna árið 2023 og félagið hagnaðist um 343 milljónir. Eignir innviðafélagsins voru bókfærðar á 4,9 milljarða í árslok 2023 og eigið fé var um 2,4 milljarðar.
Festi og Hagar greindu frá því í desember í fyrra að þau væru að kanna framtíðarmöguleika hvað varðar eignarhluti félaganna í Olíudreifingu ehf., Eldsneytisafgreiðslunni á Keflavíkurflugvelli ehf. (EAK) og EBK ehf.
