Þrjár tilkynningar um hópuppsagnir bárust í febrúar þar sem 64 starfsmönnum var sagt upp störfum á sviðum fólksflutninga, matvælaframleiðslu og heilbrigðisþjónustu.
Þetta kemur fram í tilkynningu frá Vinnumálastofnun en uppsagnirnar koma flestar til framkvæmda í maí.
Líkt og greint var frá í fjölmiðlum í gær tilkynnti Kjarnafæði Norðlenska, sem á og rekur sláturhús SAH afurða á Blönduósi, starfsfólki sínu fyrir helgi að 23 af 28 starfsmönnum sláturhússins yrði sagt upp.
Ekki hefur verið greint frá hinum hópuppsögnunum en með hópuppsögn er átt við uppsagnir atvinnurekanda á fastráðnum starfsmönnum þar sem fjöldi starfsmanna sem sagt er upp á þrjátíu daga tímabili er að minnsta kosti 10 starfsmenn í fyrirtækjum sem venjulega hafa 21-99 í vinnu, minnst 10 prósent starfsmanna í fyrirtækjum með 100-299 í vinnu eða minnst 30 starfsmenn þar sem venjulega eru 300 eða fleiri.
