Árið 1994 var litríkur fatnaður sem einkenndi seinni hluta tíunda áratugarins við það að taka við af grugg-tískunni sem hafði einkennt fyrri hluta áratugarins. Afslappaður fatnaður var vinsæll meðal yngri kynslóðarinnar og viðskiptamenn sóttu innblástur í tísku níunda áratugarins.
Hinn eini sanni hefndarkjóll
Ekki er hægt að tala um tísku ársins án þess að minnast á svokallaðan hefndarkjól (e. the revenge dress) sem Díana prinsessa klæddist á góðgerðarviðburði Vanity Fair í London sumarið 1994.
Svarta silkikjólnum, sem hönnuðurinn Christina Stambolian hannaði, klæddist Díana sama kvöld og Karl Bretaprins játaði í sjónvarpsviðtali að hafa haldið fram hjá henni en þau höfðu verið skilin að borði og sæng í tvö ár. Viðburðurinn markaði þáttaskil hjá prinsessunni og var kjóllinn til marks um aukið sjálfstæði hennar.
Voldugur stíll viðskiptamanna
Í viðskiptalífinu sóttu karlmenn sér innblástur frá níunda áratugnum þar sem tvíhnepptir jakkar í yfirstærð með axlapúðum voru áberandi.
Haldið var í jarðtóna í litavali þar sem mynstruð silkibindi voru áberandi og voru menn vel snyrtir. Stíllinn var oft kenndur við viðskiptamenn á Wall Street í Bandaríkjunum og hér á landi voru það einna helst bankamenn sem klæddust þessum stíl.
Hjá konum voru buxna- og kjóladragtir í svipuðum stíl vinsælar auk látlausra skartgripa.
H&M loksins á Íslandi
Fyrir tíma netverslunarinnar voru pöntunarlistar vinsælir og þegar flett er í gegnum gömul dagblöð sést að úr ýmsu var að velja árið 1994.
Þar má meðal annars nefna póstlista fyrir sænsku verslunina H&M þar sem yfirskriftin var „Loksins á Íslandi“.
Fyrsta H&M verslunin opnaði loks í Kringlunni rúmum tveimur áratugum síðar.
Nánar er fjallað um málið í nýútkomnu 30 ára afmælistímariti Viðskiptablaðsins. Áskrifendur geta lesið greinina í heild hér.
