Eiríkur Magnús Jensson fjármálastjóri Kviku segir söluna á TM-tryggingum, sem og vel heppnuð skuldabréfaútgáfa bankans í sænskum krónum í lok maí, gera bankanum kleift að vera með breiðara vöruframboð þegar kemur að lánsfjármögnun fyrirtækja og einstaklinga.
Í lok maí greindi Kvika markaðinum frá því að bankinn hefði stækkað skuldabréfaflokk í sænskum krónum um 500 milljónir sænskra króna eða sem nemur tæplega 7 milljörðum íslenskra króna. Upphaflega útgáfan nam 275 milljónum sænskra króna og er heildarstærð flokksins eftir útgáfuna því 775 milljónir sænskra króna.
Skuldabréfin, sem bera fljótandi vexti og hafa lokagjalddaga í maí 2026, voru seld á kjörum sem jafngilda 240 punkta álagi á þriggja mánaða millibankavexti í sænskum krónum.
Arion banki gaf út almenn skuldabréf að fjárhæð 300 milljónir evra til 4,5 ára. Skuldabréfin bera 4,625% fasta vexti sem jafngilda 175 punkta álagi yfir millibankavöxtum í evrum.
„Við vorum jákvæð gagnvart því að auka útgáfuna en sögðum það þyrfti þá að vera í samræmi við þau kjör sem hafa verið á skuldabréfaútgáfum hjá hinum bönkunum. Við vorum að gefa út á 400 punktum á síðasta ári þannig að þessi útgáfa á jafngildi 240 punkta er lækkun um 160 punkta,“ segir Eiríkur.
Áskrifendur geta lesið viðtal Viðskiptablaðsins við Eirík um söluna á TM og fjármögnun bankans hér.
