Sjóklæðagerðin hf., móðurfélag 66° Norður, tapaði 366 milljónum króna í fyrra samkvæmt nýbirtum samstæðuársreikningi félagsins.
Rekstrartekjur samstæðunnar voru 6,571 milljarður króna miðað við 5,585 milljarða króna á árinu 2022, um er að ræða 18% tekjuvöxt á milli ára í aðstæðum sem félagið segir krefjandi vegna hárrar verðbólgu og hás vaxtastigs.
Eigið fé félagsins í árslok nam um tveimur milljörðum króna og voru eignir metnar á 8,2 milljarða. Félagið mun ekki greiða út arð í ár.
Sjóklæðagerðin hf., móðurfélag 66° Norður, tapaði 366 milljónum króna í fyrra samkvæmt nýbirtum samstæðuársreikningi félagsins.
Rekstrartekjur samstæðunnar voru 6,571 milljarður króna miðað við 5,585 milljarða króna á árinu 2022, um er að ræða 18% tekjuvöxt á milli ára í aðstæðum sem félagið segir krefjandi vegna hárrar verðbólgu og hás vaxtastigs.
Eigið fé félagsins í árslok nam um tveimur milljörðum króna og voru eignir metnar á 8,2 milljarða. Félagið mun ekki greiða út arð í ár.
„Þrátt fyrir krefjandi tíma sem hefur áhrif á kaupmátt neytenda þá birtist tekjuaukningin í helstu dreifileiðum, verslunum, heildverslun og netverslun,“ segir í tilkynningu frá félaginu.
Umtalsverð tekjuaukning varð í alþjóðlegri smásölu hjá félaginu á árinu 2023 sem skýrist fyrst og fremst vegna opnunar verslunar 66°Norður á Regent Street í London en hún var opnuð í desember árið 2022.
„Árið 2023 var farsælt fyrir 66°Norður þar sem við sáum heilbrigðan vöxt á öllum okkar mörkuðum og allar dreifileiðir okkar skiluðu umtalsverðum vexti. Áhersla var á áframhaldandi fjárfestingar í fólki, innviðum og vörumerkinu til að styðja við frekari vöxt. Til að styrkja félagið enn frekar í sókn þess erlendis höfum við verið að efla stjórnendateymi okkar enn frekar með því að ráða inn fólk hér á landi og erlendis sem býr yfir umtalsverðri alþjóðlegri reynslu og þekkingu. Hluti þessa hóps verður staðsettur á skrifstofu félagsins í Kaupmannahöfn,“ segir Helgi Rúnar Óskarsson, eigandi og forstjóri Sjóklæðagerðarinnar hf.
Sölutekjur á Íslandi voru 15% meiri árið 2023 miðað við árið 2022 og jókst sala á netinu um 15% á milli ára.
„Ísland er og verður ávallt okkar mikilvægasti markaður enda eru rætur vörumerkisins hér á Íslandi og eru samofnar íslenskri atvinnusögu, menningu og náttúru. Við erum að stækka mest á erlendri grundu og þar liggja vaxtartækifærin. Kjarninn í okkar starfsemi er ábyrgð og fagmennska þar sem við hlúum að okkar góða fólki í verksmiðjum okkar og starfsstöðvum á Íslandi, Danmörku, Lettlandi, Bretlandi og Bandaríkjunum. Okkar fókus er núna sem endranær að bjóða Íslendingum upp á framúrskarandi vörur og þjónustu og á sama tíma að byggja upp skalanlega starfsemi fyrir frekari vöxt á erlendri grundu,“ segir Helgi.