Tekjur Eimskips á þriðja ársfjórðungi námu 202,0 milljónum evra og lækkuðu um 90,2 milljónir evra eða 31% samanborið við þriðja ársfjórðung 2022. Hagnaður eftir skatta nam 16,6 milljónum evra samanborið við 28,1 milljón evra á sama tímabili 2022.
Í uppgjöri skipafélagsins segir að þetta sé einkum vegna lægri alþjóðlegra flutningsverða og samdráttar í flutningsmagni í áætlunarflutningum.
„Nokkuð góður fjórðungur í áætlunarsiglingum þrátt fyrir töluverðar rekstrarlegar áskoranir í fjórðungnum. Áframhaldandi sterkur innflutningur til Íslands sem er drifinn af miklum umsvifum í hagkerfinu,“ segir í Kauphallartilkynningu félagsins.
Þá segir einnig að skörp lækkun á Trans-Atlantic flutningsverðum frá fyrra ári setji svip sinn á heildarniðurstöðuna.
Gjörbreyttar markaðsaðstæður
Rekstrargjöld námu 167,5 milljónum evra og lækkuðu um 75,1 milljón evra eða 31% frá síðasta ári. Mun þetta einkum vera vegna verulegrar lækkunar í kostnaði við aðkeypta flutningsþjónustu sem drifin er af lægri alþjóðlegum flutningsverðum.
EBITDA nam 34,5 milljónum evra sem er lækkun um 15,1 milljón frá metfjórðungi á fyrra ári en aftur á móti var EBITDA framlegð sambærileg við fyrra ár.
Afkoma hlutdeildarfélaga nam 4,4 milljónum evra í fjórðungnum sem er aukning um 0,5 milljónir evra frá síðasta ári.
„Við skiluðum góðri afkomu í fjórðungnum, á markaði sem hefur náð jafnvægi eftir mjög óvenjulegt tímabil sem einkenndist af gríðarlegum sveiflum á alþjóðlegum flutningamörkuðum. Þessar markaðsbreytingar sjást greinilega á þeirri verulegu lækkun sem við sáum bæði á tekjum og kostnaði frá fyrra ári. Þrátt fyrir þessar gjörbreyttu markaðsaðstæður, höfum við náð að halda góðri framlegð með því að einblína á framúrskarandi þjónustu, skilvirkt kostnaðaraðhald, kvika innkaupastýringu gagnvart flutningsbirgjum og virka sölustýringu,“ segir Vilhelm Már Þorsteinsson forstjóri Eimskips.
„Niðurstaðan er EBITDA sem nemur 35,4 milljónum evra í fjórðungnum, sem er umtalsverð lækkun frá 49,6 milljónum evra á sama fjórðungi síðasta árs, en við vorum meðvituð um að afkoman á síðasta ári var óvenjulega sterk og höfðu ytri aðstæður þar mikið að segja. Aftur á móti, ef við lítum lengra aftur og berum núverandi afkomu saman við afkomu félagsins fyrir Covid, sést að við höfum náð miklum árangri í að bæta grunnreksturinn,” bætir hann Vilhelm við.
„Krefjandi að reka skipafélag í óblíðum aðstæðum”
Handbært fé frá rekstri nam 29,3 milljónum evra sem er lækkun um 7,9 milljónir evra frá sama fjórðungi síðasta árs, einkum vegna breytinga á EBITDA.
„Sterk lausafjárstaða í lok tímabilsins með handbært fé að fjárhæð 47,1 milljónum evra samanborið við 46,6 milljónir evra á sama tíma í fyrra. Heildar viðhalds- og nýfjárfesting í samræmi við áætlanir fyrir fyrstu níu mánuði ársins og nam 34,0 milljónum evra samanborið við 20,6 milljónir evra fyrir fyrstu níu mánuði 2022,“ segir í uppgjörinu.
Launakostnaður jókst um 1,7 milljón evra eða 5,1% vegna launahækkana en á móti vega jákvæð gengisáhrif um 0,7 milljónir evra.
„Það er krefjandi að reka skipafélag í óblíðum aðstæðum Norður-Atlantshafsins og ýmis rekstrarleg atvik sem rekja má til veðuraðstæðna eru því miður hluti af okkar daglega rekstri. Við höfum ekki lagt það í vana okkar að fjalla sérstaklega um slík atvik, en hins vegar litaðist þriðji ársfjórðungur að þessu sinni af óvenju miklum rekstrarlegum áskorunum, þegar tvö lykilskip í siglingarkerfinu urðu fyrir alvarlegum bilunum á sama tíma og tvö skip fóru í reglubundna slipptöku. Þetta gerði það að verkum að tímabundið dró út afkastagetu og jafnvægi í gámasiglingakerfinu sem hafði áhrif á þjónustustig og olli tekjutapi ásamt kostnaði tengdum tilfærslum skipa og auknum gámakostnaði,” segir Vilhelm.
Tekjur drógust saman um 23% á fyrstu níu
Á fyrstu níu mánuðum ársins námu tekjur Eimskips 626 milljónum evra, sem er lækkun um 189 milljónir eða 23% samanborið við sama tímabil síðasta árs.
Rekstrarkostnaður á fyrri árshelming nam 525 milljónum evra og lækkar um 165 milljónir evra samanborið við fyrstu níu mánuði síðasta árs.
EBITDA nam 101 milljónum evra samanborið við 125 milljónir evra á sama tímabili síðasta árs, sem er lækkun um 24 milljónir evra.
Hagnaður eftir skatta nam 46,1 milljónum evra, samanborið við 63,5 milljóna hagnað á sama tímabili 2022.
„Ef litið er fram hjá þessum rekstrarlegu truflunum vorum við heilt yfir ánægð með magnið í áætlunarsiglingakerfinu. Þó er undantekning í flutningum í Trans-Atlantic bæði vegna samdráttar á markaði vegna minni innflutnings til Bandaríkjanna og hefðbundnum árstíðaráhrifum þar sem útflutningur frá Evrópu dregst almennt saman yfir sumarleyfistímann. Þetta er breyting frá síðustu tveimur árum sem einkenndust af umframflæði flutningsmagns í Covid. Innflutningur til Íslands var áfram sterkur í fjórðungnum og útflutningur frá Íslandi tók við sér eftir rólegt sumar samhliða auknum fiskveiðum og framleiðslu á eldislaxi. Magn í Færeyjum var ágætt þrátt fyrir að innflutningur til Færeyja sé heilt yfir minni en á sama tíma í fyrra og sú aukning í eldislaxi sem vænst var hafi ekki raungerst. Í Noregi var árstíðarbundin lágdeyða í útflutningi á hvítfiski sem varði helst til lengur en vænst var, en nú í fjórða ársfjórðungi höfum við séð magnið taka við sér.
Alþjóðlega flutningsmiðlunin okkar skilaði góðri afkomu og sterkri framlegð þrátt fyrir verulegar breytingar á markaðsaðstæðum þar sem alþjóðleg flutningsverð eru mun lægri en á sama tíma í fyrra. Innanlandsstarfsemi í landflutningum og vöruhúsaþjónustu skilaði góðri niðurstöðu í fjórðungnum, sem drifin var af umsvifum í hagkerfinu og auknu jafnvægi í landflutningakerfinu samhliða auknum fiskveiðum. Við höldum áfram að þróa umboðsþjónustu við skip á okkar heimamarkaði og nutum góðs af metvertíð í komum skemmtiferðaskipa þetta árið, bæði á Íslandi og Grænlandi,” segir Vilhelm Már Þorsteinsson forstjóri Eimskips.
