Rekstrarhagnaður og tekjur Porsche AG drógust saman á fyrstu níu mánuðum ársins í samanburði við árið á undan samkvæmt nýbirtu árshlutauppgjöri bílaframleiðandans.
Samkvæmt uppgjörinu, sem The Wall Street Journalgreinir frá, gengur Porsche illa að rafvæða flotann en einnig eru töluverð vandræði hjá bílaframleiðandanum í Kína.
Þýski sportbílaframleiðandinn seldi 226.026 bíla fyrir alls 28,56 milljarða evra á fyrstu níu mánuðum ársins. Mun það vera um 6,9% færri bílar en í fyrra og um 5,2% minni tekjur.
Lutz Meschke, varaformaður stjórnar félagsins, segir í uppgjörinu að þriðji ársfjórðungurinn hafi verið sá slakasti á árinu en eftirspurn eftir Porsche-bifreiðum í Kína hefur verið að dragast saman.
Rekstrarhagnaður Porsche dróst saman um 27% miðað við fyrstu níu mánuði ársins 2023 og nam 4 milljörðum evra á tímabilinu.
Meschke segir þó í uppgjöri að fjórði ársfjórðungurinn líti betur út og að bílaframleiðandinn sé tilbúinn að „bruna yfir endamarkið.“