Trump Media and Technology Group (TMTG), sem rekur samfélagsmiðilinn Truth Social og er undir stjórn Trump-fjölskyldunnar, hyggst afla tveggja milljarða dala í hlutafjáraukningu samhliða því að gefa út breytanleg skuldabréf að andvirði eins milljarðs dala.
Þetta kemur fram í umfjöllun Financial Times, sem vitnar í sex ónafngreinda heimildarmenn sem veita beinar upplýsingar um málið.
Tilkynning um fyrirhugaða fjármögnun gæti borist í aðdraganda stórs fjárfestafundar í Las Vegas í þessari viku, þar sem helstu talsmenn rafmyntageirans munu koma fram.
Meðal ræðumanna verða synir Donalds Trump, þeir Donald Jr. og Eric, varaforsetinn JD Vance og David Sachs, svonefndur „rafmyntaráðgjafi“ forsetans.
Heimildir Financial Times herma að fyrirhugað útboð hafi verið stækkað á síðustu vikum vegna mikillar eftirspurnar meðal fjárfesta.
Samkvæmt upplýsingum blaðsins verður hlutafjárútboðið framkvæmt með svokölluðum „at-the-market“ kjörum, sem þýðir að hlutabréf verða seld á verði nærri markaðsgengi. Gengi hlutabréfa TMTG nam 25,72 dölum við lokun markaða á föstudag, sem jafngildir markaðsvirði upp á nær sex milljarða dala.
TMTG sendi frá sér yfirlýsingu þar sem fullyrt var að „blaðamenn Financial Times væru heimskir og hlustuðu á enn heimskari heimildir“ en veitti engar frekari upplýsingar.
Hvorki Donald Trump Jr. né Hvíta húsið vildu tjá sig um málið.
Áformin eru hluti af víðtækari stefnu forsetans og fjölskyldu hans um að gera Bandaríkin að „rafmyntahöfuðborg heimsins“, eins og Trump hefur lýst yfir ítrekað.
Eftir endurkjör sitt í forsetaembættið á síðasta ári færði Trump 53 prósenta hlut sinn í TMTG, sem er metinn á um þrjá milljarða dala, í afturkræfan sjóð í umsjón sonar hans, Donalds Jr., sem hefur fullt vald yfir fjárfestingum og atkvæðisrétti í félaginu.
Trump-fjölskyldan hefur þegar komið að ýmsum verkefnum tengdum rafmyntum, þar á meðal útgáfu NFT-safnkorta, tveimur svonefndum „memecoin“-gjaldmiðlum, og fjárfestingum í fyrirtækjunum American Bitcoin og World Liberty Financial, sem starfa á sviði námuvinnslu og stöðugleikamyntar.
Þá hyggst TMTG stofna kauphallarsjóð (ETF) með áherslu á rafmyntir, og hélt Trump nýverið einkakvöldverð fyrir helstu fjárfesta memecoin sínum í lúxusdvalarstaðnum sínum utan við Washington.
Sérfræðingar segja að aðferð TMTG minni á stefnu fyrirtækisins MicroStrategy (nú Strategy), sem hefur hagnast verulega með því að fjármagna kaup á bitcoin með skuldabréfum og hlutafé.
Markaðsvirði félagsins hefur rokið upp í yfir 100 milljarða dala.
