Amazon neyddist til að draga til baka orðróm um að fyrirtækið væri að íhuga að birta áhrif tolla við afgreiðslu pantana á netinu eftir að Donald Trump forseti Bandaríkjanna hringdi í Jeff Bezos stofnanda Amazon.
Hvíta húsið lýsti því yfir að slíkt skref væri „fjandsamleg og pólitísk aðgerð“ á blaðamannafundi í dag.
Netverslunarrisinn sagði seinnipartinn að hann hefði íhugað að sýna hversu mikið innflutningsgjöld myndu hækka verð á nýju, ódýru verslunarsíðunni Haul, en bætti við að hugmyndin hefði „aldrei verið samþykkt og verði ekki framkvæmd.“
Amazon sagði einnig að hugmyndin hefði ekki verið hugsuð fyrir aðalsíðu Amazon og engar breytingar hefðu verið innleiddar á neinum síðum í eigu Amazon.
Viðbrögð fyrirtækisins komu þó of seint til að forðast afskipti Hvíta hússins. Trump hringdi í Bezos til að lýsa áhyggjum sínum eftir að Punchbowl News greindi frá því að Amazon hygðist sýna áhrif tolla við greiðslu á netinu, samkvæmt heimildarmönnum málsins.
Í kjölfar gagnrýni frá Karoline Leavitt talskonu Hvíta hússins lækkuðu hlutabréf Amazon.
„Þetta er fjandsamleg og pólitísk aðgerð af hálfu Amazon,“ sagði Leavitt við fréttamenn. „Af hverju gerði Amazon þetta ekki þegar ríkisstjórn Biden jók verðbólgu í hæstu hæðir í 40 ár?“
Amazon neitaði að tjá sig um símtalið milli Trump og Bezos. Fyrirtækið hafði íhugað að birta tolla áður en áform ríkisstjórnar Trump um breytingar sem taka gildi 2. maí á vinsælli undanþágu frá tollum, þekkt sem de minimis, sem gildir fyrir smásendingar frá Kína, taka gildi, samkvæmt heimildarmanni.
Undanþágan hafði gert smásendingum frá löndum utan Bandaríkjanna kleift að sleppa við tolla og tollskoðanir. Fjöldi vara á Haul-síðu Amazon hefur nýtt sér þessa undanþágu.
