Donald Trump Bandaríkjaforseti hefur kynnt nýja loftvarnaráætlun, „Gyllta hvolfþakið“, sem hann segir að verði komið í gagnið á innan við þremur árum. Um er að ræða stærsta og dýrasta eldflaugavarnaverkefni í sögu Bandaríkjanna.
Á blaðamannafundi í Hvíta húsinu tilkynnti Trump að heildarkostnaður verkefnisins nemi um 175 milljörðum dollara eða um 22.566 milljörðum króna á gengi dagsins. Um er að ræða tæplega fimmfalda landsframleiðslu Íslands í fyrra.
Samkvæmt Trump verða fyrstu 25 milljarðarnir fjármagnaðir í gegnum fjárlaga- og skattalagafrumvarp ríkisstjórnarinnar, sem nú er til umræðu á Bandaríkjaþingi.
Samkvæmt Trump verða fyrstu 25 milljarðarnir fjármagnaðir í gegnum fjárlaga- og skattalagafrumvarp ríkisstjórnarinnar, sem nú er til umræðu á Bandaríkjaþingi.
Verkefnið ber nafnið „Golden Dome“ eða „Gyllta hvolfþakið“, augljóslega í tilvísun við „Iron Dome“, eldflaugavarnarkerfi Ísraels.
Trump sagði það verða „fullkomlega virkt“ fyrir lok kjörtímabils hans og að kerfið muni nýta nýjustu tækni „á landi, sjó og í geimnum“.
Ekki tilbúin tækni
Þótt Trump hafi fullyrt að kerfið muni geta grandað bæði langdrægum og ofurhraðfleygum eldflaugum með hjálp leysitækni og gervihnatta, benda sérfræðingar á að hluti þeirrar tækni sem á að styðjast við sé enn ekki til.
Trump var studdur af varnarmálaráðherra sínum, Pete Hegseth, og herforingjum úr bandarísku geimherdeildinni, þar á meðal Michael Guetlein hershöfðingja sem mun leiða verkefnið.
Forsetinn vísaði einnig til Ronald Reagan og Star Wars-verkefnisins úr kalda stríðinu sem aldrei varð að veruleika.
„Reagan vildi þetta fyrir mörgum árum, en þá hafði enginn tæknina. Nú höfum við hana,“ sagði Trump.
Trump kvaðst treysta á bandarískan tæknigeira og lýsti sérstaklega miklu trausti til tæknifyrirtækja í kisíldalnum. „Við höfum hluti sem enginn annar hefur,“ sagði hann.
Fyrirtæki á borð við SpaceX, Palantir og Anduril eru talin líkleg til að fá verkefni, ásamt hefðbundnum varnarsamningafyrirtækjum á borð við Lockheed Martin og RTX.
Lockheed hefur þegar opnað vefsíðu þar sem fyrirtækið lýsir sig tilbúið til að „taka þátt í verkefni á stærð við Manhattan-verkefnið“.
