Tyrkneski seðlabankinn kom mörkuðum verulega á óvart í gær er bankinn ákvað að hækka stýrivexti sína um 500 punkta og standa meginvextir bankans því í 50%.
Samkvæmt Reuters var hækkunin mun meiri en spár greiningaraðila gerðu ráð fyrir en aðeins 9 dagar eru í sveitarstjórnarkosningar í Tyrklandi og áttu flestir von á hóflegri vaxtahækkun sökum þess.
Tyrkjum hefur þó illa tekist að ná tökum á verðbólgunni en ársverðbólga í landinu mælist um 70%.
Piotr Matys, sérfræðingur á gjaldeyrismörkuðum hjá Touch Capital í Lundúnum, segir í samtali við Reuters að hækkunin sýni skýra stefnu nýs seðlabankastjóra um að ná tökum á verðbólgunni.
Fatih Karahan tók við sem seðlabankastjóri Tyrklands fyrr á árinu eftir að Hafize Gaye Erkan steig til hliðar eftir linnulausar árásir í fjölmiðlum vegna starfa sinna.
