Hlutabréfaverð Oculis hélt áfram að hækka í Kauphöllinni í dag er gengi líftæknilyfjafélagsins fór upp um 7% í milljarða króna viðskiptum.
Dagslokagengi Oculis var 2000 krónur og hefur aldrei verið hærra.
Oculis var stofnað af Einari Stefánssyni, prófessor í augnlækningum, og Þorsteini Loftssyni, prófessor í lyfjafræði, fyrir tuttugu árum. Tækni Oculis byggir á nanóögnum, gerðum úr sýklódextrín-sameindum, sem nýttar eru til að auka leysanleika augnlyfja og gefa lengri virkni.
Fjárfestar virðast vera að binda vonir við jákvæðar niðurstöður frá Matvæla- og lyfjaeftirliti Bandaríkjanna (FDA) en forsvarsmenn Oculis funduðu með eftirlitinu í ágústmánuði vegna undirbúnings til umsóknar um markaðsleyfi á OCS-01.
Um er að ræða augndropa til meðferðar við bólgu og verkjum eftir augnaðgerðir en droparnir eru sagðir byltingarkenndir og er Oculis með einkaleyfi á framleiðslu þeirra til ársins 2040.
Samkvæmt árshlutauppgjöri Oculis veitti fundurinn skýra leið að umsókn um markaðsleyfi á fyrsta ársfjórðungi 2025.
Halldór Kristmannsson, hluthafi í Oculis, sem rekur ráðgjafarfyrirtækið Aviva Communication, skrifaði í morgun um félagið þar sem hann sagði átta verðmöt erlendra greiningaraðila benda til þess að virði félagsins væri um 2 til 3 sinnum meira en núverandi markaðsvirði.
Ef FDA veitir Oculis síðan markaðsleyfi á lyfjum sínum gjörbreytist staðan hins vegar.
„Ef OCS-01 og OCS-02 verða markaðssett í Bandaríkjunum í þeim meðferðarflokkum sem stefnt er að, verður gengi hlutabréfanna 42,5-62,5 Bandaríkjadalir á hlut,“ skrifar Halldór á Innherja.
Samsvarar það um 5763 til 8475 krónum á hlut miðað við gengi dagsins.
Gengi Icelandair er ekki hærra síðan í febrúar
Hlutabréfaverð Play lækkaði um 5% í örviðskiptum eftir rúma 12% hækkun í gær. Heimsmarkaðsverð á olíu hefur verið að hafa áhrif á gengi flugfélaganna en viðsnúningur varð á olíuverði í morgun.
Verðið á Brent-hráolíu, sem er notuð í eldsneyti, hefur lækkað um rúm 4% í dag og stendur tunnan í 77,3 dölum.
Hlutabréfaverð Icelandair hækkaði um 2,5% í rúmlega 300 milljón króna viðskiptum. Dagslokagengi Icelandair var 1,2 krónur og hefur ekki verið hærra síðan í febrúar.
Úrvalsvísitalan hækkaði um 0,16% og var heildarvelta 6,3 milljarðar.
