Fjöldi nýskráðra fyrirtækja í atvinnurekstri árið 2024 var 3.376, þar af 2.913 einkahlutafélög, samkvæmt Hagstofu Íslands.
Flestar nýskráningar voru í byggingarstarfsemi og mannvirkjagerð eða 537 sem þó er fækkun um 13% frá fyrra ári.
Í heild drógust nýskráningar fyrirtækja í atvinnurekstri saman um 4% miðað við árið 2023.
Á árinu voru 851 fyrirtæki tekin til gjaldþrotaskipta sem er 30% fækkun frá fyrra ári þegar 1.220 fyrirtæki urðu gjaldþrota.
Af 851 fyrirtæki sem tekið var til gjaldþrotaskipta í fyrra voru 339 með virkni á fyrra ári, þ.e. höfðu rekstrartekjur eða greiddu laun árið 2023.
Gjaldþrotum virkra fyrirtækja fækkaði um 9% frá fyrra ári.
„Hjá þeim 339 virku fyrirtækjum sem tekin voru til gjaldþrotaskipta árið 2024 störfuðu að jafnaði 1.973 starfsmenn árið 2023. Borið saman við fyrra ár var lítil breyting á heildarfjölda launafólks sem gjaldþrotin höfðu áhrif á. Eftir atvinnugreinum störfuðu flestir í byggingarstarfsemi og mannvirkjagerð, eða 733, og litlu færri í einkennandi greinum ferðaþjónustu eða 638,“ segir á vef Hagstofunnar.
