Nýtt bandarískt dvalarleyfiskerfi sem gengur undir heitinu „Trump Card“ hefur vakið mikinn áhuga meðal fjárfesta um allan heim. Um 68.703 umsækjendur höfðu skráð sig á biðlista aðeins örfáum dögum eftir að vefsvæðið trumpcard.gov fór í loftið.
Kerfið er undir stjórn verslunarráðherra Bandaríkjanna, Howard Lutnick, og býður erlendum fjárfestum löglega búsetu í Bandaríkjunum gegn fjárfestingu upp á 5 milljónir Bandaríkjadala eða 620 milljónir íslenskra króna.
„Kortið verður úr gulli. Það verður fallegt,“ segir Lutnick í samtali við Financial Times og bætti við að forseti Trump legði mikið upp úr útliti og tilfinningu slíks skjals.
Myndin af Donald Trump og undirskrift hans prýða sjálft kortið, ásamt örninum bandaríska, þjóðfánanum og Frelsisstyttunni.
Kerfið virðist sækja innblástur í hefðbundna ímynd landsins og forsetans sem vörumerki.
Samkvæmt Lutnick kom upphafshugmyndin frá fjárfestinum John Paulson, nánum stuðningsmanni Trumps.
Tilgangurinn sé að safna tekjum í ríkissjóð og draga úr 36.000 milljarða dala skuld ríkisins. Ef 200.000 kort verða seld gæti ríkissjóður fengið allt að eina billjón dala í tekjur.
Kerfið er sérstaklega ætlað stjórnendum fyrirtækja og fólki úr atvinnulífinu sem vill fá löglega búsetu í Bandaríkjunum fyrir sig og sína.
Talsmaður stórs tæknifyrirtækis, sem óskaði nafnleyndar, staðfesti í samtali við FT að fyrirtækið hygðist kaupa yfir 100 slík kort, kæmi verkefnið til framkvæmda. Sagði hann það hluta af því að „bjóða framúrskarandi frumkvöðla, verkfræðinga og vísindamenn velkomna til Bandaríkjanna.“
Lutnick kynnti hugmyndina jafnframt fyrir ráðamönnum í Sádi-Arabíu, Katar og Sameinuðu arabísku furstadæmunum í fylgd Trumps í maí síðastliðnum.
„Ég get ekki annað en kynnt þetta fyrir alþjóðlegum stjórnendum. Ég geri það alltaf,“ sagði hann.
Trump Card er talin hugsanlegur arftaki EB-5 dvalarleyfisins sem hefur verið í boði frá árinu 1990. EB-5 veitir varanlegt búsetuleyfi gegn fjárfestingu að lágmarki 800.000 til 1,8 milljóna dala.
Um 14.000 slík leyfi voru veitt í fyrra. Lutnick hefur lýst vilja til að fella EB-5 út og koma Trump Card í staðinn, jafnvel innan nokkurra mánaða.
Enn sem komið er þurfa umsækjendur aðeins að skila inn nafni, netfangi og heimshluta. Mikilvæg atriði eru þó enn ófrágengin, þar á meðal skattlagning handhafa og hvaða þjóðum gæti verið meinaður aðgangur að kerfinu.
Samkvæmt heimildum FT hafa bandarísk yfirvöld þegar útilokað ferðalög frá talsverðum fjölda ríkja og fleiri eru til skoðunar.
Paolo Ardoino, forstjóri Tether og samstarfsmaður Lutnicks úr fyrra starfi hjá Cantor Fitzgerald, hefur lýst efasemdum um ávinninginn.
„Vandamálið við að vera bandarískur ríkisborgari eða með bandarískt leyfi er að maður þarf að greiða skatta í Bandaríkjunum, hvar sem maður býr,“ sagði hann í viðtali í apríl. „Ég bý í Sviss og El Salvador. Af hverju ætti ég að kaupa þetta?“
Þrátt fyrir að kerfið sé enn í mótun virðist áhuginn gríðarlegur. Á aðeins klukkustund jókst skráningin um rúmlega eitt þúsund manns. Óljóst er hver raunverulegur gangur málsins verður en ráðgert er að útgáfa fyrstu kortanna hefjist nú í sumar.
