Hlutabréfaverð Icelandair hækkaði um rúm 3% í 80 milljón króna viðskiptum í dag. Dagslokagengi félagsins var 1,08 krónur og hefur hlutabréfaverð flugfélagsins því hækkað um 7% síðastliðna tvo viðskiptadaga.
Viðskiptablaðið greindi frá því í morgun að ráðgjafarfyrirtækið Akkur meti lokagengi hlutabréfa Icelandair í lok ársins á 2,1 krónu á hlut.
Gengi félagsins hefur undanfarna mánuði verið rétt yfir útboðsgengi þess í september 2020, sem var 1,0. Hæst fór gengið árið 2022 í 2,2.
Heimsmarkaðsverð á olíu hefur einnig áhrif á gengi flugfélagsins en verðið á Brent hráolíu hefur lækkað um rúm 9% á síðustu fimm dögum.
Tunnan af Brent hráolíu, sem er notuð í flugvélaeldsneyti, stendur í 65 dölum sem er lækkun frá 73 dölum í vikubyrjun.
Hlutabréfaverð Kviku banka lækkaði um rúmt 1% í 246 milljón króna viðskiptum og var dagslokagengi bankans 17,08 krónur á hlut.
Samkvæmt heimildum Viðskiptablaðsins eru samtöl innan bankanna um mögulegan samruna við Kviku enn í gangi þrátt fyrir að stjórn Kviku hafnaði samrunaviðræðum við Arion og Íslandsbanka um miðjan mánuð.
Gengi Kaldalóns leiddi lækkanir á markaði í dag er gengi félagsins fór niður um tæp 2% í lítilli veltu.
Úrvalsvísitalan lækkaði um 0,39% og var heildarvelta á markaði 2,5 milljarðar.
