Síldarvinnslan hagnaðist um 20,1 milljón dala, eða 2,8 milljarða króna á gengi dagsins í dag, á þriðja ársfjórðungi, samkvæmt árshlutauppgjöri útgerðarfélagsins sem birtist í dag.
Hagnaður félagsins á fyrstu níu mánuðum ársins nemur um 8,8 milljörðum íslenskra króna. Rekstrartekjur félagsins á fyrstu níu mánuðum ársins námu 317,9 milljónum dala sem samsvarar um 44,5 milljörðum króna á gengi dagsins.
Í uppgjörinu segir að makrílveiðin fór að mestu leyti fram innan lögsögunnar og gekk vel. Veiðar á norsk-íslenskri síld gengu vel og var stutt að sækja. Þá gekk sala á uppsjávarafurðum vel á fjórðungnum en það voru minni umsvif á bolfiskveiðum og -vinnslu vegna sumarleyfa og kvótastöðu. Þá greinir félagið frá því að margir útgjaldaliðir hafa hækkað.
Eignir samstæðunnar um 150 milljarðar
Heildareignir samstæðunnar í lok tímabilsins voru 1,083 milljarðar Bandaríkjadala. Séu niðurstöður efnahagsreiknings reiknaðar í íslenskum krónum á gengi krónunnar í lok tímabilsins námu eignir samstæðunnar 148,1 milljarði króna, skuldir 63,7 milljörðum og eigið fé 84,4 milljörðum.
Eiginfjárhlutfall var 57,0% í lok tímabilsins. Í lok árs 2022 var eiginfjárhlutfallið 55,2%.
„Rekstur samstæðunnar gekk vel á ársfjórðungnum. Uppsjávarveiðar og vinnsla gengu vel en umsvif voru minni í bolfiskveiðum og vinnslu sökum sumarleyfa og kvótastöðu. Skip félagsins veiddu vel af makríl á fjórðungnum og fór veiðin að mestu fram í íslenskri lögsögu. Líkt og undanfarin ár voru skip félagsins í veiðisamstarfi á makrílvertíð sem hefur gefist vel. Makrílveiðum lauk um miðjan ágúst og við tóku veiðar á norsk-íslenskri síld. Framleiðsla uppsjávarafurða var talsverð á tímabilinu. Heilt yfir hefur sala uppsjávarafurða gengið vel, bæði á frosnum afurðum og mjöl- og lýsisafurðum,” segir Gunnþór Ingvason forstjóri í uppgjörinu.
Fjárfestingarhreyfingar neikvæðar um 2,1 milljarð
Handbært fé frá rekstri nam 53,5 milljónum dala á fyrstu níu mánuðum ársins 2023 sem samsvarar 7,5 milljörðum króna á gengi dagsins en var 57,2 milljónir dala fyrstu níu mánuðum ársins 2022.
Fjárfestingahreyfingar voru neikvæðar um 15,4 milljónir dala eða 2,1 milljörðum króna á gengi dagsins. Fjármögnunarhreyfingar neikvæðar um 50,8 milljónir dala sem er um 7,1 milljarður.
„Sveiflur í ytra umhverfi og á mörkuðum eru ekki nýjar af nálinni í okkar rekstri. Það er mikill styrkur fyrir Síldarvinnsluna að hafa fjölbreyttan rekstur sem gerir félagið betur í stakk búið að mæta óvæntum áskorunum. Birgðir félagsins eru bókfærðar á 89 m. USD og hafa aukist um 30 m. USD frá áramótum. Munar þar mestu um mikla framleiðslu loðnuhrogna sem enn sitja í birgðum að hluta til.
Um miðjan september tilkynnti félagið um lokun bolfiskvinnslunnar á Seyðisfirði. Rekstrarumhverfi bolfiskvinnslunnar hefur breyst hratt á undanförnum árum. Fjölmargir kostnaðarliðir hafa hækkað umtalsvert, öll fjármögnun er orðin dýrari og þorskheimildir hafa dregist saman. Samkeppnishæfni og sveigjanleiki eldri vinnslna sem ekki hafa fjárfest í nýjustu tækni er enn minni við erfiðari markaðsaðstæður.
Hlutdeildarfélag Síldarvinnslunnar, Arctic Fish, varð fyrir miklu tjóni á þriðja ársfjórðungi þegar slátra þurfti talsvert af laxi félagsins vegna lúsafaraldurs. Eins slapp lax úr einni af kvíum félagsins í sumar þegar gat kom á kvína. Síldarvinnslan á 34,2% hlut í Arctic Fish og er hlutdeild Síldarvinnslunnar í afkomu Arctic Fish á fyrstu níu mánuðum ársins neikvæð um 5,3m. USD sem má rekja til þess tjóns sem félagið varð fyrir af þessum sökum. Það er forgangsatriði félagsins að tryggja að slíkir atburðir endurtaki sig ekki,“ segir Gunnþór í uppgjörinu.
Óvissa um endanlegt tjón í Grindavík
Í uppgjörinu er greint frá því að mikil óvissa sé vegna jarðhræringa á Reykjanesi en Síldarvinnslan hefur stöðvað tímabundið bolfiskvinnslu félagsins í Grindavík.
„Starfsmönnum hefur tekist að bjarga öllum verðmætum sem bundin voru í birgðum og hluta lausafjár. Engar sjáanlegar skemmdir hafa komið í ljós á eignum félagsins og enn sem komið er hefur ekki orðið vart við umfangsmikið tjón utan rekstrarstöðvunar bolfiskvinnslunnar.
Mikil óvissa hefur ríkt hjá starfsfólki Vísis eins og öllum íbúum Grindavíkur frá því að jarðhræringarnar hófust. Því hefur verið lögð áhersla á að halda samskiptum við starfsfólk og styðja það með upplýsingagjöf eins og frekast er kostur,“ segir Gunnþór.
Ekki er útséð hvert endanlegt tjón félagsins verður vegna þessara atburða enda ríkir enn óvissa með framvindu mála, segir í uppgjörinu.
„Vísbendingar eru um að hættan í Grindavík sé á undanhaldi og hægt verði að hefja vinnu við að koma starfsemi félagsins í fyrra horf.
Heilt yfir er uppgjörið gott og í takt við væntingar félagsins. Aukið vægi bolfisksheimilda og fjárfestingar síðustu ára jafna út sveiflur á milli tegunda. Þrátt fyrir ýmsar áskoranir er félagið með sterkan efnahag og fjölbreyttan rekstur til að takast á við framtíðina. Sem fyrr hefur Síldarvinnslan lagt áherslu á fjárfestingar til að þjóna viðskiptavinum sínum betur en aðeins með fjárfestingu í greininni er sjávarútvegurinn í stakk búinn að verja samkeppnisforskot sitt á alþjóðlegum mörkuðum,“ segir Gunnþór.
