Hlutabréfaverð Nvidia og Meta tóku væna dýfu á markaði í gær og ýttu þannig Nasdaq vísitölunni, þar sem tæknifyrirtækin eru þungamiðjan, niður um 2,8% í gær, sem er mesta lækkun ársins.
S&P 500 vísitalan féll um 1,4% á meðan Dow Jones hækkaði um 0,6% en leita þarf aftur til ársins 1999 til að finna dag sem S&P 500 lækkaði um meira en 1% meðan Dow Jones hækkaði samkvæmt The Wall Street Journal.
Donald Trump er sagður bera að hluta til ábyrgð á lækkunum gærdagsins en í viðtali við Bloomberg sagðist hann vera afar ósáttur með yfirburði TSMC frá Taívan á örflögumarkaðinum en TSMC er stærsti örflöguframleiðandi heimsins.
Trump sagði réttast að Taívan greiði Bandaríkjunum fyrir að verja landið gegn mögulegri ásókn frá Kína.
Gengi TSMC féll á markaði í Taívan en óttinn um alþjóðleg átök á örflögumarkaði smitaði út frá sér. Gengi Nvidia lækkaði um 6,6% og Qualcomm um 8,6% í gær.
Örflögukauphallarsjóður iShares lækkaði um 7,1%.