Jón Eggert Hallsson, sjóðstjóri hjá Stefni, telur að ef tillögur um uppgjör íbúðabréfa (HFF-bréfa) nái fram að ganga muni það hafa jákvæð áhrif á skuldabréfamarkaðinn.
Á mánudaginn tilkynnti viðræðunefnd fjármálaráðherra og ráðgjafar 18 lífeyrissjóða tillögur um uppgjör bréfanna sem munu greiða fyrir slitum ÍL-sjóðs.
Virði HFF-bréfanna í uppgjörinu er metið 651 milljarður króna og er m.a. lagt til að ríkissjóður gefi út og afhendi kröfuhöfum ríkisskuldabréf að andvirði 540 milljarða króna.
Í tengslum við uppgjörið gefur ríkissjóður út ný ríkisskuldabréf að fjárhæð 540 milljarða króna þar sem m.a. er gerð upp eldri skuld ríkissjóðs við ÍL-sjóð að fjárhæð 238 milljarða króna auk þess sem ábyrgð ríkissjóðs á skuldbindingum ÍL-sjóðs er gerð upp.
Verði svo að samningur náist mun fjöldi verðtryggðra ríkisskuldabréfa á markaðinum þrefaldast.
Spurður um áhrifin af þessu segir Jón Eggert sú fjölgun vera af hinu góða.
„Það er frábært að fá fleiri flokka. Þetta eykur dýpt markaðarins og ég lít það mjög jákvæðum augum,“ segir Jón Eggert í samtali við Viðskiptablaðið.
Spurður um hvort það skipti einhverju máli að verið sé að tvíefla verðtryggðu hliðina, segir Jón Eggert það ekkert endilega neikvætt.
„Öll aukin skilvirkni er góð og lífeyriskerfið er heilt yfir með verðtryggðar skuldbindingar og ef þú horfir á kerfið í heild sinni þá eru eignirnar með talsvert styttri líftíma heldur en skuldbindingar þannig ég held það sé jákvætt að auka dýptina á langa verðtryggða endanum.“
Að mati Jóns Eggerts er þó það mikilvægasta að það komist niðurstaða í málið svo hægt sé að klára málefni ÍL-sjóðs.
„Til að mynda ef við horfum á þetta út frá lánshæfismati þá eru allar flækjur fyrir utanaðkomandi aðila til skilja betur stöðu ríkisins vondar. Það er bara mjög jákvætt heilt yfir að skýra þetta mál og fá endanlega niðurstöðu. Það er bara mjög jákvætt fyrir land og þjóð.“
Fjármálaráðuneytið áætlar að aðgerðin skili jákvæðu greiðsluflæði til ríkissjóðs á næstu árum og að skuldahlutföll A-hluta ríkissjóðs muni að loknum öllum ráðstöfunum vegna uppgjörsins batna um a.m.k. 5% af vergri landsframleiðslu.
Ríkisábyrgðir muni jafnframt lækka um 88% miðað við stöðu í árslok 2024. Verðbréf, sem ríkissjóður hefur gefið út eða ábyrgst, munu við uppgjör HFF bréfanna lækka um 111 milljarða króna að markaðsvirði.
Spurður um hvort uppgjörið hafi einhver áhrif á hagkerfið í heild segir Jón Eggert erfitt að meta það að svo stöddu enda margir þættir sem togi í mismunandi áttir.
„Til að mynda það að lífeyrissjóðirnir fái 55 milljarða í evrum. Ég myndi halda það væri mjög jákvætt fyrir krónuna til skemmri tíma. Það minnkar gjaldeyriskaup lífeyrissjóðanna í einhvern tíma. Það er mjög jákvætt,“ segir Jón Eggert. „Það er þó erfitt að sjá hvort þetta hafi einhver teljandi áhrif á verðbólgu, vexti og verðbólguvæntingar. Það er erfitt að meta það að svo stöddu,“ segir Jón Eggert en samkvæmt tillögunum mun ríkið leggja til 73 milljarða í reiðufé, þar af 55 milljarða í evrum og 18 milljarða í krónum.
Spurður um hvort þetta gæti haft áhrif á ávöxtunarkröfu ríkisskuldabréfa og þar af leiðandi neikvæð áhrif á aðra vexti, segir Jón Eggert það ekkert endilega stöðuna.
„Aukin skilvirkni, fleiri flokkar er jákvætt upp á skilvirkari verðmyndun. Hvort að ávöxtunarkrafan eigi að vera hærri eða lægri út af þessu er erfitt að leggja mat á það.“
Jón Eggert segir að það skipti einnig máli að eigendur HFF-bréfanna hefðu fengið tugi milljarða í afborgun á þessu ári af HFF-bréfunum sem þeir fá ekki núna en þeir fá ríkisbréf í staðinn.
„Þannig þetta hefur mikil áhrif á uppbyggingu skuldabréfamarkaðarins heilt yfir.“
Að mati Jóns Eggerts er því niðurstaðan ekki bara jákvæð fyrir ríkissjóð heldur einnig lífeyrissjóðina sem fá langar verðtryggðar eignir í staðinn.
Skuldbindingar lífeyrissjóða eru verðtryggðar og langar en sé litið á áhættustýringu þá eru þeir með of stutta eignarhlið, því geta löng verðtryggð skuldabréf verið ágætis eign fyrir lífeyrissjóði.
