Úrvalsvísitalan OMXI15 hækkaði um tæp 1,7% í dag og var lokagildi hennar 2.841 stig. Vísitalan hefur ekki verið hærri síðan um mitt ár 2022.
Það sem af er ári hefur vísitalan hækkað um 15,6% en til samanburðar hefur OMXS30 í Svíþjóð hækkað um 7% á árinu og OMXC25 í Kaupmannahöfn hækkað um 1,19%.
Úrvalsvísitalan skákar einnig FTSE 100 í Lundúnum sem hefur hækkað um rúm 7%. Stoxx Europe 600 hefur hækkað um rúm 9% það sem af er ári.
Sex félög á aðalmarkaði hækkuðu um meira en 4% í viðskiptum dagsins en gengi líftæknilyfjafélaganna Oculis og Alvotech leiddu hækkanir í Kauphöllinni í dag.
Gengi Oculis hækkaði um 7% í 903 milljón króna viðskiptum í dag. Dagslokagengi félagsins var 2.460 krónur sem er um 22% hærra en gengi félagsins eftir skráningu í apríl.
Hlutabréfaverð Alvotech hækkaði um rúm 6% í 611 milljón veltu. Dagslokagengi Alvotech var 1.690 krónur sem er tæpum 7% hærra en gengi félagsins í ársbyrjun.
Hlutabréfaverð flugfélaganna Play og Icelandair hækkaði einnig í viðskiptum dagsins og fór gengi Icelandair upp um tæp 4% í 101 milljón króna veltu. Gengi Play hækkaði um tæp 5% í örviðskiptum.
Gengi Heima fór upp um 4,5% í 408 milljón króna veltu og var dagslokagengið 37,2 krónur. Hlutabréfaverð Heima hefur leitt hækkanir á aðalmarkaði það sem af er ári og hækkað um 55% á árinu.
Gengi Kaldalóns hækkaði um tæp 5% í 100 milljón króna viðskiptum og var dagslokagengið 26,6 krónur.
Heildarvelta á markaði var 9,8 milljarðar.
