Þrátt fyrir að vöruskiptahalli sé að aukast hefur hann ekki aukist eins mikið á milli ára í ár og síðustu tvö ár, samkvæmt greiningardeild Landsbankans.
Síðasta áratug hefur verið viðvarandi vöruskiptahalli og því sé hann viðbúinn að mati bankans en þó séu jákvæð teikn á lofti.
Í október jukust útflutningsverðmæti eldisfisks um 26% á milli ára á föstu gengi og það sem af er ári hafa verðmætin aukist um 24% á milli ára.
„Útflutningsverðmæti lyfja og lækningavara færast nokkuð hratt í aukana og nú í október voru útflutningsverðmæti þeirra um 84% meiri en í fyrra. Það sem af er ári hafa útflutningsverðmæti aukist um 57% á milli ára á föstu gengi,“ segir í Hagsjá Landsbankans.
Annar útflutningur hefur staðið nokkurn veginn í stað það sem af er ári, samkvæmt greiningardeildinni.
Verðmæti vöruinnflutnings jókst um 6% á milli ára á föstu gengi í október en það sem af er ári hafa verðmætin aukist um 1%.
„Innflutningur fjárfestingarvara jókst um 2% á milli ára í október á föstu gengi, en það sem af er ári hefur innflutningur á fjárfestingarvörum aukist um 4%. Nokkuð hefur hægt á innflutningi fjárfestingarvara eftir því sem liðið hefur á árið,“ segir í hagsjá bankans.
Í nýlegri hagspá Landsbankans er gert ráð fyrir litlum breytingum á fjárfestingu á seinni hluta ársins og segir bankinn gögnin styðja þá spá.
Innflutningur á hrávörum jókst hins vegar um 30% í október og hafa innflutningsverðmæti hrávara aukist um 8% á föstu gengi það sem af er ári.
Þá jókst innflutningur á neysluvörum um 11% í október og hefur aukist um 7% það sem af er ári á föstu gengi.
Á móti hefur innflutningur á fólksbílum dregist töluvert saman það sem af er ári, eða um 48%. Við spáum lítilli aukningu í einkaneyslu á árinu.
