Hlutabréfaverð Síldarvinnslunnar leiddi lækkanir á aðalmarkaði í dag er gengi félagsins fór niður um tæp 5% í viðskiptum dagsins. Dagslokagengi Síldarvinnslunnar var 94,75 krónur sem er þó rúmu prósentustigi hærra en í ársbyrjun.
Á sama tíma lækkaði gengi Ísfélagsins um rúm 4% en bæði félög hafa hækkað á síðustu vikum á meðan loðnumælingar hafrannsóknarstofnunar hafa staðið yfir.
Hafrannsóknarstofnun greindi hins vegar frá því eftir lokun markaða á föstudaginn að bráðabirgðaniðurstöður loðnumælinga gæfu til að kynna að ráðgjöf um að engar veiðar veturinn 2024/2025 verði ekki breytt.
Niðurstöður bermálsmælinganna sýna að heildarmagn fullorðinnar loðnu sem myndar veiðistofn vertíðarinnar er aðeins um tveir þriðju þess sem mældist í september 2024.
Rannsóknaskip Hafrannsóknastofnunar, Árni Friðriksson, ásamt þremur uppsjávarveiðiskipum, Heimaey, Polar Ammassak og Barða, hafa verið við loðnumælingar síðan 16. janúar.
Hlutabréfaverð Brims lækkaði einnig í viðskiptum dagsins er gengi félagsins fór niður um 2,5%. Gengi Hampiðjunnar lækkaði síðan um 4% í viðskiptum dagsins.
Gengi JBT Marel leiddi hækkanir á aðalmarkaði er gengi félagsins fór upp um rúm 5% í 236 milljón króna viðskiptum. Dagslokagengi JBT Marel var 18.500 krónur.
Úrvalsvísitalan lækkaði um 0,04%. Heildarvelta á markaði 4,2 milljarðar.
