Vilhjálmur Birgisson, formaður Starfsgreinasambandsins, er orðlaus yfir hótunum Hollywood- stjarna um að sniðganga Ísland verði hvalveiðar leyfðar aftur.
„Ég er orðlaus yfir þessari frétt um að einhverjar Hollywood-stjörnur hóti sniðgöngu verði hvalveiðar leyfðar á ný. Ætlar þetta fólk að segja hvernig við Íslendingar eigum að nýta okkar auðlindir? Hvaða della er þetta?“ skrifar Vilhjálmur á Facebook og vísar í kvöldfréttir Stöðvar 2í gærkvöldi þar sem greint var frá undirskriftalista sem safnað er í Hollywood gegn hvalveiðum Íslendinga.
Ættu að einbeita sér að byssulöggjöf heima fyrir
Líkt og kunnugt er stöðvaði Svandís Svavarsdóttir hvalveiðar í sumar með frestun til 1. september sem ber upp á morgun. Svandís mun í hádeginu í dag kynna ákvörðun sína um hvort hvalveiðar verði leyfðar að nýju eður ei en málið hefur skapað mikla ólgu innan ríkisstjórnarinnar.
Nú hafa Hollywood-stjörnur á borð við Leonardo DiCaprio blandað sér í deiluna.
„Væri ekki nær fyrir þessar Hollywood-stjörnur að byrja á að taka til í sínum garði áður en þær fara að hóta okkur Íslendingum og segja okkur hvernig við eigum að nýta okkar sjávarauðlind. Væri ekki nær að allir leikarar í Hollywood myndu leggja niður störf þar til byssulöggjöf í Bandaríkjunum verði breytt?“ skrifar Vilhjálmur.
