Bandarísku fjárfestingasjóðirnir, Vanguard og Eaton Vance, bættu töluvert við hlutabréfaeign sína í Íslandsbanka í maí samkvæmt nýbirtum gögnum frá Verðbréfaskrá Nasdaq.
Vanguard jók hlut sinn úr 2,4 % í 4,2 % milli apríl og maí og bætti þannig við sig 33.519.401 hlutum á einum mánuði.
Þetta gerir Vanguard að fimmta stærsta hluthafa Íslandsbanka með samtals 78.989.177 hluti í bankanum í lok maí.
Á sama tíma bætti Eaton Vance við sig 2.936.000 hlutum í maí og fór eignarhlutur fjárfestingafélagsins í Íslandsbanka upp í 0,9%.
Eaton Vance er nú fimmtándi stærsti hluthafi Íslandsbanka með um 17.127.297 hluti í bankanum.
Töluverð viðskipti voru með bréf Íslandsbanka í maímánuði en líkt og kunnugt er seldi ríkið eignarhlut sinn í bankanum í mánuðinum.
Tugmilljarða velta hefur verið með bréf bankans á eftirmarkaði enda var markaðsgengið töluvert yfir útboðsgengi.
