Milljarðamæringurinn og stofnandi vogunarsjóðsins Bridgewater Associates, Ray Dalio, varar við því að Bretland gæti verið á leið í „skuldaspíral“ þar sem landið þurfi að taka sífellt meira lán til að standa undir hækkandi vaxtakostnaði.
Í viðtali við Financial Times lýsti Dalio áhyggjum sínum af því að hækkandi vaxtagreiðslur, sem nú nema yfir 100 milljörðum punda á ári, ásamt þörf fyrir endurfjármögnun skulda á hærri vöxtum, gætu myndað vítahring sem leiðir til aukinnar skuldsetningar.
Líkt og Viðskiptablaðið greindi frá í síðustu viku rauk fjármögnunarkostnaður breska ríkisins upp úr öllu valdi skömmu en Rachel Reeves, fjármálaráðherra Bretlands stefnir á metútgáfu skuldabréfa á árinu.
„Þetta lítur út eins og skuldaspírall í uppsiglingu,“ sagði Dalio. „Það mun krefjast meiri lántöku til að standa undir skuldum, draga úr annarri opinberri útgjaldaneyslu eða leiða til hærri skatta.“
Markaðssveiflur og vaxtahækkanir
Dalio benti á að nýlegar sveiflur á markaði, þar á meðal veiking pundsins og hækkun ávöxtunar á bresk ríkisskuldabréf til 30 ára ( e. gilts), gefi til kynna að markaðurinn eigi erfitt með að takast á við aukna lántökuþörf Bretlands frá fjárlagafrumvarpinu í október í fyrra.
Áhyggjur vegna þrálátrar verðbólgu hafa einnig leitt til þess að væntingar um vaxtalækkanir seðlabanka hafa dregist saman, sem hefur aukið ávöxtunarkröfur á skuldabréf.
Ávöxtun 10 ára breskra ríkisskuldabréfa hækkaði í 4,93 prósent í upphafi mánaðarins, við hæstu hæðir síðan í fjármálakreppunni, en hefur nú lækkað í 4,66 prósent.
Skuldir Bandaríkjanna einnig áhyggjuefni
Dalio sagði einnig að Bandaríkin sýndu „merki“ um að markaðurinn gæti átt í erfiðleikum með að taka við aukinni lántöku þar í landi. Hann kallar stjórnun skuldabyrðarinnar „stærsta vandamálið“ fyrir stjórnvöld, hvort sem litið er til Bandaríkjanna eða Bretlands.
„Þegar þú þarft að taka lán til að greiða vexti á núverandi skuldum og vaxtastig hækkar, þá skapast vítahringur þar sem skuldirnar halda áfram að vaxa,“ sagði Dalio, sem nýverið gaf út greiningu sína á ríkisskuldakrísum, „How Countries Go Broke“.
Ákall um aðhaldsaðgerðir
Dalio lagði til að fjárlagahallinn í báðum löndum yrði minnkaður niður í 3 prósent af landsframleiðslu. Hann viðurkenndi að niðurskurður ríkisútgjalda eða skattahækkanir gætu dregið úr hagvexti, en bætti við: „Þetta mun leiða til lægri vaxta, sem aftur hefur örvandi áhrif á hagkerfið.“
Þó að fjárfestar hafi dregið úr samanburði við markaðskreppuna eftir „mini-budget“ Liz Truss árið 2022 stendur breska ríkisstjórnin frammi fyrir auknum þrýstingi.
Fjármálaráðherrann Rachel Reeves hefur orðið fyrir gagnrýni vegna hækkandi vaxtakostnaðar og aukinnar skuldsetningar.
Dalio lýsti skuldastöðu heimsins sem „kölkun í æðakerfi“, sem gæti sprungið með ófyrirsjáanlegum afleiðingum.
„Þú veist ekki hvenær þetta mun gerast, en áhættan eykst og hættan er mikil,“ sagði hann að lokum.
