Frumvarp atvinnuvegaráðherra, Hönnu Katrínar Friðriksson, um hækkun veiðigjalda hefur verið samþykkt á Alþingi. Atkvæðagreiðsla um frumvarpið fór fram eftir hádegi í dag.
Ríkisstjórnin ákvað á föstudaginn að beita 71. grein þingskapalaga, svonefndu kjarnorkuákvæði, og takmarka þannig ræðutíma þingmanna til að koma frumvarpinu í atkvæðagreiðslu.
Stjórnarliðar samþykktu frumvarpið en enginn þingmaður stjórnarandstöðunnar greiddi atkvæði með því.
Frumvarpið felur í sér verulega hækkun veiðigjalda og hafa Samtök fyrirtækja í sjávarútvegi (SFS) og Samtök sjávarútvegssveitarfélaga lýst yfir miklum áhyggjum af áhrifum frumvarpsins.
Í yfirlýsingu Samtaka sjávarútvegssveitarfélaga um helgina er m.a. varað við að veiðigjaldahækkunin geti leitt til aukinnar samþjöppunar og að starfsemi fiskvinnsla leggist af í ákveðnum byggðarlögum.
