Verðlag hækkaði um 6,4% á ársgrundvelli milli aprílmánuða, samkvæmt tölum sem Hagstofa Noregs (SSB) birti í dag.
„Verðbólga er enn mikil, en á undanförnum mánuðum höfum við séð merki um að sé að draga úr hækkunartakti“, segir Espen Kristiansen deildarstjóri hjá Hagstofu Noregs í samtali við Dagens Næringsliv.
Kjarnaverðbólga, sem er vísitala neysluverðs leiðrétt fyrir skattabreytingum og að undanskildum orkuvörum (CPI-ATE), var 6,3% á ársgrundvelli í apríl. Verðbólgu hafði verið spáð 6,1% og til samanburðar mældist verðbólga 6,2% í mars síðastliðnum.
Beðið eftir vaxtastökki
Kjersti Haugland, aðalhagfræðingur DNB markaða, segir að tölurnar komi á óvart og styrki þá trú að stýrivextir verði hækkaðir á næstu þremur fundum peningastefnunefndar Seðlabanka Noregs. Ef úr rætist yrðu stýrivextir 4% í september næstkomandi.
„Þetta eru ekki fagnaðarfréttir fyrir Seðlabanka Noregs, sem nú þegar glímir við veikt gengi krónunnar, og hefur einnig verið tilkynnt um launauppgjör sem er sterkara en gert var ráð fyrir,“ er haft eftir Haugland.
Seðlabanki Noregs spáði því í mars að stýrivextir myndu ná hámarki á bilinu 3,5% til 3,7%. Haugland telur ósennilegt að úr því rætist.
