Vinnustöðvun flugumferðastjóra, sem eru með um 1,5 milljón krónur í meðallaun en krefjast ígildi 25% launahækkunar, mun hafa „þó nokkur áhrif“ á flugáætlun Icelandair á morgun.
Félag íslenskra flugumferðarstjóra hefur boðað til verkfalls á morgun, fimmtudaginn 14. desember, á milli kl. 4:00 og 10:00.
„Þannig mun flugi sem er á áætlun snemma í fyrramálið frá Norður-Ameríku til Íslands og frá Íslandi til Evrópu seinka. Sömuleiðis mun verkfallið hafa keðjuverkandi áhrif á flug síðdegis, bæði frá Evrópu til Íslands og frá Íslandi til Norður-Ameríku og Evrópu. Starfsfólk Icelandair fylgist náið með stöðunni og mun hafa samband við farþega með hefðbundnum samskiptaleiðum ef breyting verður á flugi,“ segir í tilkynningu frá Icelandair.
Flugumferðarstjórar hafa einblínt á að höggva í íslensku flugfélögin með því að einblína á vinnustöðvun á aðflugsvæðinu FAXI sem hefur næstum bara áhrif á íslensku flugfélögin. Í gær þurfti að aflýsa 25 brottförum vegna vinnustöðvunar flugumferðastjóra en 23 þeirra voru á vegum Play eða Icelandair.
„Við breytingar á flugáætlun hefur starfsfólk Icelandair það að markmiði að allir farþegar komist á áfangastað innan sama ferðadags og að halda keðjuverkandi áhrifum á flugáætlunina í lágmarki. Flugáætlunin 14. desember er umfangsmikil en gert er ráð fyrir að verkfallsaðgerðirnar hafi áhrif á um 60 flug og þar með ferðalög um 8.300 farþega Icelandair,“ segir í tilkynningu Icelandair.
Bæði Icelandair og Play hafa átt erfitt uppdráttar nú í haust vegna óvissu í kringum jarðhræringar á Reykjanesskaga sem hefur haft teljandi áhrif á bókunarstöðuna. Flugfélögin færðu bæði afkomuspá sína fyrir árið niður nýverið.
Icelandair hefur birt yfirlit yfir helstu aðgerðir sem félagið þarf að fara í á morgun:
- Flug frá Norður-Ameríku sem átti að lenda um og upp úr klukkan sex í fyrramálið er nú á áætlun á milli 10:30-11:00.
- Flug til Evrópu sem átti að fara í loftið á bilinu 7:20-8:40 er nú á áætlun á milli klukkan 09:45-11:45
- Flug til London Gatwick í fyrramálið verður sameinað flugi til London Heathrow
- Tvær ferðir til Amsterdam verða sameinaðar
- Flugi til Frankfurt og Berlínar verður aflýst og farþegar endurbókaðir í gegnum Munchen og Zurich
- Hluti tengifarþega á leið til Stokkhólms og Óslóar hefur verið endurbókaður í gegnum Helsinki
- Í vikunni hefur farþegum sem eiga bókað flug á verkfallsdögum verið boðið að færa flugið sitt og ferðast þannig einum degi fyrr eða síðar.
- Hluti tengifarþega hefur verið endurbókaður með öðrum flugfélögum á milli Evrópu og Norður-Ameríku.
- Morgunflugi til Akureyrar er aflýst og farþegum boðið að ferðast með öðru flugi innan dags.
- Morgunflugi til Egilsstaða seinkar
