Á síðustu sex viðskiptadögum frá því að frá því að fjárfestar í útboði ríkisins fengu hluti afhenta í bankanum hefur verið um 25 milljarða króna velt með bréf bankans.
Á tímabilinu skiptust rúmlega 215 milljónir hluta um hendur, sem samsvarar 11,5% af heildarfjölda útistandandi hluta bankans.
Mest var veltan þann 21. maí, eða tæpir 10 milljarðar króna, þegar 86,9 milljónir hluta gengu kaupum og sölum í 768 viðskiptum. Fagfjárfestar sem keyptu í tilboðsbók B fengu meðal annars bréf sín afhent þann dag en þeir keyptu fyrir 3,7 milljarða króna á sama gengi og almenningur, 105,56 krónur á hlut.
Þann dag var meðalverð hlutabréfanna 117,52 krónur og lokaverð 119 krónur.
Á næstu dögum hélt veltan áfram að vera talsverð en fór þó aldrei yfir sjö milljarða. Hæst fór meðalverðið yfir tímabilið þann 22. maí í 119,32 krónur.
Minni viðskipti voru aftur á móti skráð 26. maí, þegar aðeins 12 milljónir hluta gengu kaupum og sölum, með heildarveltu upp á um 1,4 milljarða króna og meðalgengi 115,94 krónur.
Meðalgengi viðskipta yfir tímabilið (meðal daglegra meðalgilda) var 118,12 krónur á hlut, sem endurspeglar stöðugleika í verðmyndun bréfanna þrátt fyrir mikinn fjölda viðskipta.
10 milljarða „afsláttur“
Ef ríkið hefði selt hina 850.000.007 hluti sína í Íslandsbanka á meðalverðinu 118,12 kr. á hlut, þá hefði það fengið um 100,4 milljarða króna.
Það er um 9,9 milljörðum króna meira en endanlegt söluverðmæti upp á 90,5 milljarða króna.
Dagslokagengi bankans hefur á tímabilinu haldist nokkuð stöðugt í 117–118 krónum sem bendir til þess að bréfin hafi ekki sætt miklum sveiflum í kjölfar aukinnar veltu.
Það sem af er degi hefur gengi Íslandsbanka haldist stöðugt í 117,5 krónum á hlut eftir 712 milljón króna viðskipti.
Lífeyrissjóðir eru stærstu hluthafar bankans eftir útboð ríkisins og fer Lífeyrissjóður starfsmanna ríkisins með stærstan hlut upp á rúm 8%.
