Hlutabréfaverð augnlyfjaþróunarfélagsins Oculis hefur hækkað um 6% síðastliðna viku eftir að hafa lækkað um tæp 17% frá lokum apríl.
Oculis var skráð í Kauphöllina 23. apríl og hækkaði gengið á fyrstu viðskiptadögum. Gengið náði hámarki í 1.820 krónum þann 30. apríl en lækkaði síðan hægt og rólega niður í 1.530 krónur í síðustu viku.
Gengið hefur nú tekið við sér á ný og var dagslokagengið 1.620 krónur eftir um tæplega 3% í 162 milljón króna viðskiptum.
Hlutabréfaverð Marel hækkaði um rúm 2% í 232 milljón króna viðskiptum og var dagslokagengi Marsel 497 krónur. Hluthafar Marels eru með valfrjálst yfirtökutilboð JBT í allt hlutafé Marels í höndunum um þessar mundir en bandaríska fyrirtækið væntir þess að fá svar um byrjun september.
Gengi Icelandair, sem hefur verið í sögulegri lægð, tók við sér í dag og hækkaði einnig um rúm 2%. Dagslokagengi Icelandair var 0,88 krónur.
Úrvalsvísitalan OMXI15 hækkaði um 0,95% og var heildarvelta á markaði 1,7 milljarðar.
