Verkefnisstjórn 5. áfanga rammaáætlunar kynnti í samráðsgátt stjórnvalda skömmu fyrir áramót drög að flokkun tíu vindorkukosta, þar sem lagt var til að allir kostirnir yrðu settir í biðflokk, þar af tveir kostir sem höfðu áður verið settir í nýtingarflokk.

Alls bárust 122 umsagnir, þar á meðal frá hagsmunasamtökum á borð við Samorku, Viðskiptaráð og Samtök iðnaðarins. Hagsmunasamtökin lýsa yfir áhyggjum af tillögunum og gera athugasemdir við ýmsa þætti, einna helst mat á efnahagslegum áhrifum og áhrifum á orkuöryggi.

Samorka bendir á að lítið sem ekkert hafi verið horft til Orkustefnu til 2050 og orkuspáa Landsnets og Orkustofnunar, þar sem fram kemur að framboð á raforku muni ekki duga til að mæta eftirspurn næstu ár og áratugi. Sömuleiðis hafi ekki verið horft til aðgerðaráætlunar stjórnvalda í loftslagsmálum og markmiða um kolefnishlutleysi 2040, auk samfélags- og efnahagslegra hagsmuna þjóðarinnar.

Sjá einnig
Þörf á breytingum áður en gríðarlegt tjón hlýst af

Samtökin, líkt og hin sem skiluðu inn umsögn, gerir þó einna helst athugasemdir við umfjöllun faghóps 3 um efnahagslegan ávinning, orkuöryggi og innviðauppbyggingu en í skýrslu faghópsins kemur fram að ekki hafi verið reynt að áætla umfang efnahagslegs ávinnings orkukostanna, þrátt fyrir að fram hafi komið í vinnu faghópsins mikilvægi þessa.

Þá hafi liggi ekki fyrir í mati verkefnisstjórnarinnar nein greining og mat á orkuöryggi en í niðurstöðu faghóps 3 sé einungis vísað til samtala við sveitarstjórnarfólk og mat þeirra á áhrifum. Sömu sögu megi segja af umfjöllun um innviðauppbyggingu.

Hvað röksemdir verkefnisstjórnarinnar um skort á framtíðar stefnumótun stjórnvalda varðar benda samtökin á að tvö vindorkuverkefni hafi þegar verið afgreidd frá Alþingi í orkunýtingarflokk, Búrfellslundur og Blöndulundur. Einnig er athygli vakin á því að tveir virkjunarkostir sem áður hafði verið lagt til að yrðu færðir í orkunýtingarflokk, Alviðra og Garpsdalur, séu færðir í biðflokk án þess að skýr rök liggi fyrir slíku.

„Þetta dregur einfaldlega fram þá vankanta sem eru á því ferli sem rammaáætlun er og hversu flöktandi og ógagnsæjar niðurstöðurnar eru í heild sinni og skort á samræmi við markmið og tilgang laganna.“

Nánar er fjallað um málið í Viðskiptablaðinu. Áskrifendur geta lesið fréttina í heild hér.