Meirihluti fjárlaganefndar leggur til að embætti forseta Íslands fái 20 milljónir til viðbótar við það sem fjárlög gera ráð fyrir vegna „sívaxandi ásóknar“ í að forsetinn og eiginkona hans mæti á hina ýmsu viðburði með tilheyrandi kostnaði.
„Lagt er til að veitt verði 20 m. kr. framlag til embættis forseta Íslands til að halda óbreyttu umfangi á rekstri embættisins. Þá er sívaxandi ásókn í aðkomu forseta að hinum ýmsu viðburðum og stóraukið aðgengi að Bessastöðum með tilheyrandi umsýslu og kostnaði. Einnig hefur í vaxandi mæli verið sóst eftir aðkomu maka forsetans og hefur virkni maka forseta áhrif á rekstur embættisins,“ segir í nefndaráliti meirihluta fjárlaganefndar Alþingis.
Framlag úr ríkissjóði til embættis forseta Íslands í fjárlögum er 363,2 milljónir króna og því er um 5,5% hækkun á því framlagi að ræða til að mæta vinsældum forsetahjónanna.
Meirihluti fjárlaganefndar leggur til að embætti forseta Íslands fái 20 milljónir til viðbótar við það sem fjárlög gera ráð fyrir vegna „sívaxandi ásóknar“ í að forsetinn og eiginkona hans mæti á hina ýmsu viðburði með tilheyrandi kostnaði.
„Lagt er til að veitt verði 20 m. kr. framlag til embættis forseta Íslands til að halda óbreyttu umfangi á rekstri embættisins. Þá er sívaxandi ásókn í aðkomu forseta að hinum ýmsu viðburðum og stóraukið aðgengi að Bessastöðum með tilheyrandi umsýslu og kostnaði. Einnig hefur í vaxandi mæli verið sóst eftir aðkomu maka forsetans og hefur virkni maka forseta áhrif á rekstur embættisins,“ segir í nefndaráliti meirihluta fjárlaganefndar Alþingis.
Framlag úr ríkissjóði til embættis forseta Íslands í fjárlögum er 363,2 milljónir króna og því er um 5,5% hækkun á því framlagi að ræða til að mæta vinsældum forsetahjónanna.
Breytingartillögurnar auka halla ríkissjóðs
Breytingartillögur nefndarinnar í heild auka halla ríkissjóðs um rúmar 615 milljónir en tekjuáætlun frumvarpsins fer úr 8.026,1 m. kr í 8.641,9 m. kr.
„Heildarafkoman verður þá neikvæð um 46.910 m. kr. en sú afkoma rúmast vel innan þess ramma sem fjármálastefnan leyfir. Hallinn nemur þá 1% af vergri landsframleiðslu (VLF),“ segir í tillögum nefndarinnar.
Á nýliðnum peningamálafundi Viðskiptaráðs sagði Ásgeir Jónsson seðlabankastjóri að síðustu fjárlög hafi verið „óheppileg“ og nefndi hann þau meðal ástæðna þess að verðbólguþrýstingur jókst á árinu.
„Núverandi fjárlög, allavega eins og ég hef séð þau, eru ekki að kynda undir verðbólgu,“ sagði Ásgeir á fundinum en bætti við að þetta væri háð því að þau taki ekki miklum breytingum í þinginu.
Ein stærsta breytingin sem meirihluta fjárlaganefndar leggur til er að auka framlag í almennan varasjóð um 3,3 milljarða vegna óvissu um kjarasamningsbundnar hækkanir á árinu 2024. Framlag ríkisins í sjóðinn myndi því aukast samtals um 11,5 milljarða milli ára en eftir að niðurstöður kjarasamninga liggja fyrir verða millifærðar fjárveitingar á stofnanir og verkefni af almenna varasjóðnum.
Vilja styrkja rekstur RIFF
Breytingar nefndarinnar eru margvíslegar en þar er meðal annars lagt til Bíó Paradís fái tímabundinn 18 milljón króna styrk til reksturs félagsins. Ásamt því er gerð tillaga um að Alþjóðlega kvikmyndahátíðin í Reykjavík, RIFF, fái tímabundið 17 milljón króna framlag til styrktar reksturs.
Einnig er lagt til að framlag til Stofnunar Árna Magnússonar í íslenskum fræðum hækki annars vegar um 35 milljónir, vegna hækkunar á leigu í Eddu, húsi íslenskunnar, og hins vegar um 65 milljónir vegna aukinnar mannaflaþarfar við flutninga í húsið.
„Á árinu 2024 mun Árnastofnun byrja að borga leigu fyrir rými í Eddu, húsi íslenskunnar, og mun heildargreiðsla á ári nema 335 m. kr. Í fjárlögum fyrir árið 2023 var búið að tryggja 300 m. kr. til að koma til móts við leiguna en þar sem heildarleigan verður 335 m. kr. vantar 35 m. kr. í rekstur stofnunarinnar til að hún geti staðið undir leigugreiðslunum,“ segir í breytingum.
Kostnaður eykst um 100 milljónir árlega vegna flutninga
Við flutninga Árnastofnunar í Eddu mun rekstrarkostnaður við húsnæðið ásamt aukinni mannaflaþörf hækka rekstrarkostnað stofnunarinnar.
„Nú liggur fyrir áætlun um að kostnaður muni aukast um 100 m. kr. árlega vegna breyttrar starfsemi í kjölfar flutninganna. Í sumar sl. var samþykkt að leggja til 35 m. kr. viðbótarfjárveitingu í fjárlagafrumvarpinu til að tryggja öryggi vegna vöktunar og húsumsjónar sem og móttöku gesta. Það vantar til viðbótar 65 m. kr. árlega til að stofnunin geti rekið húsnæðið og tryggt þann mannafla sem þarf til að starfrækja starfsemi stofnunarinnar í Eddu.“
![](http://vb.overcastcdn.com/images/124338.width-1160.jpg)