Félag atvinnurekenda (FA) hefur sent öllum sveitarfélögum í landinu erindi, þar sem hvatt er til þess að álagningarprósenta fasteignaskatts á atvinnuhúsnæði verði endurskoðuð til að mæta hækkunum fasteignamats þannig að sköttum á atvinnuhúsnæði verði haldið óbreyttum á milli ára.
HMS kynnti á dögunum að fasteignamat fyrir árið 2026 hækkar að meðaltali um 9,2% milli ára. Meðalhækkun fasteignamat atvinnueigna hækkar um 4,8%. Á höfuðborgarsvæðinu nemur hækkunin 3,8% en á landsbyggðinni um 9,1%.
Í frétt á vef FA er bent á að álagður fasteignaskattur á atvinnuhúsnæði hafi numið um 36,6 milljörðum króna á síðasta ári og áætla þau að hann verði nær 39 milljörðum króna í ár.
„Þá hafði álagningin hækkað að raunvirði um 50% á einum áratug, þrátt fyrir lækkanir sumra sveitarfélaga á álagningarprósentu á tímabilinu […] Hlutfall fasteignaskatts á atvinnuhúsnæði hefur á sama tíma hækkað úr um 0,7% af landsframleiðslu í 0,8% og er óvíða hærra í OECD-ríkjunum.“
Vilja breytt kerfi um fasteignaskatta
FA hvetur sveitarfélög til uppbyggilegs samtals við ríkisvaldið um breytt kerfi skattlagningar fasteigna með minni sveiflur og meiri fyrirsjáanleika að markmiði.
„Skattlagning, sem byggir á sveiflum í fasteignaverði en ekki raunverulegri afkomu fyrirtækja, leggst þungt á fyrirtæki, ekki sízt þau minni og meðalstóru,“ segir í erindi FA til sveitarfélaganna, sem Ólafur Stephensen framkvæmdastjóri undirritar.
FA vísar í því efni til skýrslu starfshóps sem skipaður var fulltrúum FA, Sambands íslenzkra sveitarfélaga, Húsnæðis- og mannvirkjastofnunar, Húseigendafélagsins og Landssambands eldri borgara. Skýrslan kom út snemmsumars 2023.
Félagið vekur sérstaklega athygli á skýrslu starfshóps um endurskoðun á grunni álagningar á fasteignir sem kom út árið 2023. Hópurinn lagði til að sett verði meðalhófsþak á prósentubreytingu fasteignaskatta milli ára og að svokallaður B-skattur (á húsnæði hins opinbera) og C-skattur (á annað atvinnuhúsnæði) verði sameinaðir, m.a. til þess að draga úr samkeppnishindrunum sem leitt geta af ólíkri skattlagningu og matsaðferðum á húsnæði einkafyrirtækja og stofnana hins opinbera.
„Meðalhófsþak, sem líka hefur verið kallað skattabremsa, myndi gilda hvort sem er til hækkunar eða lækkunar. Þannig væru fasteignaeigendur varðir fyrir óhóflegum hækkunum fasteignamats, en sveitarfélögin hefðu líka vörn gagnvart verðfalli og lækkun matsins. Með þessu væri ennfremur komið í veg fyrir hvata sveitarfélaganna til að stuðla að óeðlilegum hækkunum fasteignaverðs,“ segir í erindi FA.
FA segist einnig staldra við fréttatilkynningu HMS, þar sem greint er frá því að stofnunin hyggist einhliða endurskoða aðferðir við gerð fasteignamats atvinnueigna. „Að mati félagsins er nauðsynlegt að slík vinna fari fram í breiðu samráði og samtali.“
