Samkvæmt nýbirtri greiningu Akkurs á fyrirhuguðum samrunaviðræðum Arion banka og Kviku er talið ólíklegt að Samkeppniseftirlitið (SKE) heimili samrunann í óbreyttri mynd, einkum vegna yfirburðastöðu sameinaðs banka á eignastýringarmarkaði.
Líklegt er talið að Arion banki þyrfti að selja frá sér eignastýringu Kviku sem skilyrði fyrir samþykki, en ekki er útilokað að fleiri einingar þurfi að fara sömu leið.
Líkt og Viðskiptablaðið greindi frá í gær ákvað stjórn Arion banka á fundi sínum í gær að óska eftir því við stjórn Kviku banka að hafnar verði samrunaviðræður á milli félaganna tveggja.
Arion sagði að ákveði stjórn Kviku banka að ganga til samrunaviðræðna sé það von Arion að viðræður hefjist sem fyrst.
Stjórn Íslandsbanka ákvað síðan einnig að óska eftir samrunaviðræðum við Kviku og sendi bréf þess efnis á stjórn bankans í morgun.
Íslandsbanki segist reiðubúinn að bjóða 10% ofan á markaðsvirði Kviku við útreikning á skiptihlutföllum.
Í greiningu Akkurs á Arion banka og Kviku kemur fram að bankarnir tveir voru samanlagt með 1.083 starfsmenn í árslok 2024.
Landsbankinn, sem er með um þriðjungi stærri efnahagsreikning, stefnir í um 900 stöðugildi eftir kaupin á TM tryggingum.
Akkur metur það raunhæft að fækka stöðugildum sameinaðs Arion og Kviku um 150, sem myndi skila um 3,5 milljörðum króna í árlegum sparnaði.
Auk þess sé mögulegt að spara að minnsta kosti 2,5 milljarða króna í öðrum rekstrarkostnaði (m.t.t. fasteigna, þjónustu og stoðkerfa), sem leiðir samanlagt til um 6 milljarða króna í mögulegri samlegð á kostnaðarhlið.
Greining Akkurs bendir til þess að Arion banki njóti 80–120 punkta lægri fjármögnunarkostnaðar á erlendum skuldabréfamörkuðum samanborið við Kviku.
Ef sameinaður banki gæti lækkað kostnað Kviku um 100 punkta væri hægt að ná 650 milljóna króna árlegri lækkun á fjármögnunarkostnaði.
Frekari lækkanir, til dæmis 10 bps fyrir sameinaðan banka í heild gætu bætt afkomu um 300 milljónir króna fyrir hverja slíka lækkun.
Kvika rekur lánastarfsemi í Bretlandi undir nafninu Ortus, sem Akkur telur að gæti blómstrað innan stærri samstæðu.
Arion gæti veitt hagkvæmara fjármagn til starfseminnar og Ortus gæti vaxið hratt með sterkari bakhjarli.
Enn fremur myndi stærra efnahagslegt rými samstæðunnar gera Ortus kleift að vaxa án þess að verða of stór hluti samstæðunnar.
Akkur telur að sameinaður banki hefði umtalsvert meira virði en bankarnir tveir hvor í sínu lagi.
Miðað við hagnaðarspá og samlegðaráhrif er áætlaður virðisauki allt að 60 milljarðar króna, sem myndi nýtast hluthöfum, einkum lífeyrissjóðum sem eru stærstu eigendur beggja banka.
Miðað við hluthafalista dagsins í dag yrði ekki um mikla breytingu á hluthafahópi að ræða, þar sem margir eigendur eiga í báðum bönkum.
Akkur bendir á að þóknanatekjur í verðbréfamiðlun og ráðgjöf gætu dregist saman í kjölfar samruna, þar sem slík viðskipti fylgja oftar tilteknum einstaklingum en rekstrareiningum. Þá væri hugsanlegt að hluti af starfsmannakjarnanum flyttist annað.
