Einar Örn Ólafsson forstjóri Play segir fjölmarga kosti fylgja því að afskrá Play úr Kauphöll Íslands. Hann vonast þó til að margir hluthafar ákveði að vera áfram í félaginu til að taka þátt í „vegferðinni sem er fram undan.“
Líkt og Viðskiptablaðið greindi frá fyrr í dag ákváðu tveir stærstu hluthafar flugfélagsins Play, Einar Örn og Elías Skúli Skúlason, varaformaður stjórnar, að gera yfirtökutilboð í allt hlutafé félagsins og afskrá félagið úr Kauphöllinni.
Yfirtökutilboðið hljóðar upp á eina krónu á hlut en hluthafar geta valið að fá annaðhvort greitt í formi hlutar í nýju félagi eða reiðufjár.
Yfirtökutilboðið verður fjármagnað með að lágmarki 20 milljóna dala fjárframlagi, sem samsvarar um 2,5 milljörðum króna, en af þeirri fjárhæð er þegar skuldbinding fyrir rúmlega þriðjungi fjárhæðarinnar.
„Auðvitað hefur skráning ýmsa kosti í för með sér eins og geta gefið út skráða pappíra og þá vera með annars konar kaupendur að þeim pappírum. En ókostirnir eru líka til staðar. Því fylgir ýmis kostnaður og gjöld. Það þarf að greiða fyrir viðskiptavakt, það þarf að greiða fyrir skráningu og alls konar. Þar að auki er töluvert umstang í kringum þetta sem tekur töluverðan tíma frá stjórnendum fyrirtækisins sem þurfa að vera að sinna markaðinum, ef svo má segja,“ segir Einar í samtali við Viðskiptablaðið.
Hann bætir við að þar að auki setji skráningin stjórnendum ákveðnar skorður um hvernig þeir megi haga sér ólíkt því þegar félög eru óskráð.
„Maður þarf að passa sig og gæta hvað maður segir og hvernig maður hagar sér. Þannig þegar okkur langar til að gera eitthvað sem er stórt og merkilegt þá þurfum við oft að hugsa „megum við þetta“ eða „þurfum við að greina frá því fyrst“ og það er ekki endilega alltaf gott að greina frá til dæmis viðræðum í miðjum viðræðum og fleira,“ segir Einar.
Samþykki 90% hluthafa er skilyrði fyrir því að yfirtökutilboðið verði samþykkt en sem fyrr segir geta hluthafar valið að fá greitt í reiðufé eða fá hluti í hinu nýja óskráða félagi.
„Ef meiri en 10% hafna þessu þá gerist þetta ekki,“ segir Einar.
„Það er auðvitað þannig að manni þykir leiðinlegt að neyða menn út þegar við höldum að framtíðin sé bjartari. Þannig við viljum ekki gera það og leyfa öllum sem vilja að vera áfram inni,“ segir Einar.
Samkvæmt Kauphallartilkynningu Play ætlar félagið einnig að ráðast í umtalsverðar breytingar á rekstrinum samhliða afskráningunni. Flugfélagið mun áfram einblína á að bjóða upp á framboð til sólarlandastaða frá Íslandi. Flugum til Norður-Ameríku verði hins vegar hætt frá og með október 2025.
Borgaráfangastöðum í Norður-Evrópu mun einnig fækka. Flogið verður undir maltnesku flugrekstrarleyfi og íslenska flugrekstrarleyfinu verður skilað.
Fjórar flugvélar munu sinna flugi til og frá Íslandi, einkum til sólarlanda. Hinar sex vélarnar verða leigðar í arðbær verkefni til annarra flugrekenda.
Samkvæmt tilkynningu verður lögð aukin áhersla á skrifstofur félagsins í Möltu og Litháen en samhliða því mun Play fækka starfsgildum á Íslandi.
„Þetta er framhald af því sem við höfum verið að tala um í níu mánuði. Atlantshafsflugið með tengiflugi til Íslands hefur ekki verið eins gott og við héldum og alls ekki arðbært og við höfum verið að draga úr því,“ segir Einar.
Hans Jørgen Elnæs, norskur greinandi og ráðgjafi á flugmarkaði, sagði í samtali við Viðskiptablaðið í vor að helsta áskorun Play sé að einingakostnaður (CASK) sé enn þá talsvert meiri en einingatekjur (RASK). Þetta þyrfti að breytast í ár til að félagið skili hagnaði eða a.m.k. minnki tapið milli ára.
Spurður um hvort breyting á flugáætlun félagsins mæti þessum áskorunum, segir Einar ljóst að áfangastaðirnir sem flugfélagið mun halda áfram að fljúga til séu arðbærustu flugleiðirnar.
„Kostnaðurinn er svipaður, hvert sem við erum að fljúga en verðið hefur verið hæst hjá okkur á þessum sólaráfangastöðum, þar sem fólk er að fara í frí. Hvort sem það er Alicante, Tenerife og fleiri staðir. Við höfum sýnt það áður að þar er afkoman okkar langbest. Það er sá hluti starfseminnar sem við munum halda áfram með. Við drögum okkur út úr hinum og setjum þær vélar í önnur verkefni,“ segir Einar Örn.
Spurður um hvort markmiðið sé að skrá félagið aftur í framtíðinni, þegar búið er að snúa rekstrinum við, segir Einar það allt of snemmt að huga að skráningu nú þegar það er verið að huga að afskráningu.
„Það er ekki gott að tjá sig mikið um það núna. Það er kannski eitthvað sem maður skoðar eftir einhver ár. Auðvitað munu hluthafarnir þurfa að hafa einhverja útkomuleið þannig kannski á endanum, eftir fimm ár eða hvað það er, að selja félagið eða skrá það aftur til að búa til einhvern atburð þar sem fólk getur fengið peninga.“
Einar segist vona að fjárfestar sem hafa verið lengi í félaginu haldi áfram að eiga hlut í því eftir afskráningu.
„Fjárfestingin hefur auðvitað rýrnað hjá þeim sem hafa verið með okkur í lengri tíma. Þannig við erum allavega að bjóða mönnum að taka þátt í að vera áfram. Það kæmi mér ekki á óvart að nokkuð stór hluti þeirra sem eru með okkur í þessu verði það áfram.“
„Fyrir suma af þessum aðilum sem vilja frekar skráð bréf eins og lífeyrissjóður þá er þetta kannski stór fjárhæð sem menn eiga eftir í þessu þannig ég tel það sé ekki mikil fyrirstaða.“
Spurður um hvort hluthafar hafi komið að máli við sig um möguleikann á afskráningu, segir Einar Örn að þetta hefur komið til tals á síðustu misserum.
„Það hafa ýmsir nefnt þetta við mig á síðustu misserum, hvort félaginu væri ekki betur borgið utan markaðar en ég hef ekki tekið spjall við okkar stærstu hluthafa,“ segir Einar og bætir við að lokum að hann muni taka samtalið við hluthafa á næstu dögum.
