Velta á íslenska hlutabréfamarkaðnum nam 15,6 milljörðum króna í dag. Það skýrist einkum af lokunaruppboði en á mánudaginn tekur gildi aukin vigt fimmtán félaga á aðalmarkaðnum í vísitölum FTSE Russell vegna uppfærslu Íslands í flokk nýmarkaðsríkja (e. Secondary Emerging Markets).
Af áðurnefndri veltu fóru 14 milljarða viðskipti fram í pöruðum viðskiptum á lokamínútum markaðarins.
Vigt íslenska markaðarins í vísitölunum er færð upp í þremur skrefum; hið fyrsta var þann 19. september sl., annað skrefið verður á mánudaginn, 19. desember, og síðasta skrefið 20. mars næstkomandi.
Í aðdraganda hvers skrefs fer fram umfangsmikil sala til erlendra vísitölusjóða. Við fyrsta skrefið í september var sem dæmi 14 milljarða velta í 337 viðskiptum sem áttu sér stað á aðeins hálfri mínútu í svokölluðu lokunaruppboði.
„Vísitölusjóðir vilja ekki bara eiga viðskipti á síðasta degi fyrir uppfærsluna, heldur vilja þeir helst eiga viðskipti í lokunaruppboðinu og tryggja sér þannig lokaverðið á markaðnum því það minnkar frávik frá vísitöluviðmiðinu,“ sagði Magnús Harðarson, forstjóri Kauphallarinnar, í viðtali við Viðskiptablaðið í kjölfar fyrstu uppfærslunnar.
Úrvalsvísitalan lækkaði um 1,2% í viðskiptum dagsins en flest félög á lista FTSE Russell lækkuðu í dag. Gengi VÍS lækkaði mest eða um 5% í 440 milljóna veltu í dag. Mesta veltan, eða um 3,4 milljarðar, var með hlutabréf Arion banka sem lækkuðu um 2,6%. Hlutabréf Marels hækkuðu um 0,4% í 3,1 milljarðs króna viðskiptum.
Félög á lista FTSE Russell
| Gengi | Breyting |
| 151,50 | -2,57% |
| 120,20 | -1,31% |
| +0,40% | |
| -0,96% | |
| -1,36% | |
| -0,12% | |
| -3,50% | |
| -1,10% | |
| -0,94% | |
| -1,96% | |
| -2,37% | |
| -5,00% | |
| -1,60% | |
| 0,00% |
