Heildarsamstæða ríkissjóðs var rekin með 81,4 milljarða króna halla árið 2023 samanborið við 175 milljarða króna halla árið áður. Fjármálaráðuneytið birti ríkisreikning fyrir 2023 í dag.

Bætt afkoma ríkissjóðs má einkum rekja til þess að skatttekjur jukust um 18,5% milli ára og námu 1.081 milljarði króna í fyrra samanborið við 913 milljarða árið 2020. Heildartekjur án fjármunatekna og söluhagnaðar námu 1.370 milljarða.

Gjöld án fjármagnsgjalda og söluhagnaðar jukust um 4,9% og námu 1.390 milljörðum. Afkoma af rekstri var því neikvæð um 20 milljarða og batnaði frá fyrra ári þegar hún var neikvæð um 115 milljarða. Hrein fjármagnsgjöld jukust úr 45 milljörðum í rúma 72 milljarða milli ára.

Reikningurinn er í fyrsta sinn birtur sem heildarsamstæða A-, B- og C- hluta ríkisins í samræmi við innleiðingaráætlun á alþjóðlegum reikningsskilastöðlum.

Segja afkomuna langt um betri en fjármálaáætlun gerði ráð fyrir

Í tilkynningu fjármálaráðuneytisins segir að þess beri að geta að rekstrarafkoma ríkisreiknings er birt á grunni reikningsskilastaðla fyrir opinbera aðila (IPSAS) en heildarafkoma í fjármálaáætlun og fjárlögum er birt samkvæmt hagskýrslustaðli (GFS).

Til að bera afkomu ríkissjóðs samkvæmt ríkisreikningi við afkomumarkmið fjármálaáætlunar og fjárlaga þurfi því að aðlaga niðurstöðu ársreiknings A1- hluta að hagskýrslustaðlinum.

Ráðuneytið segir að á þeim grunni hafi í fjárlögum ársins 2023 verið gert ráð fyrir að heildarafkoma yrði neikvæð um 119,6 milljarða króna. Niðurstaða ársins hafi hins vegar reynst vera neikvæð heildarafkoma um 20,0 milljarða króna.

Þá var frumjöfnuður - afkoma fyrir fjármagnsliði - jákvæður um 78,7 milljarða en var áætlaður neikvæður um 50,3 milljarða samkvæmt samþykktum fjárlögum.

„Ávinningur af ábyrgri stefnu í ríkisfjármálum birtist nú í mun meira jafnvægi í þjóðarbúinu og lækkandi verðbólgu í kjölfar efnahagslegra sviptivinda undangenginna ára. Samfélagslegur ábati af sterkri stöðu ríkissjóðs birtist einnig í því hversu vel hann var í stakk búinn til að takast á hendur mikil, óvænt og tilfallandi útgjöld vegna jarðhræringanna í Grindavík og nauðsynlegar stuðningsaðgerðir þeim tengdum,“ segir Sigurður Ingi Jóhannsson, fjármála- og efnahagsráðherra um niðurstöður ríkisreiknings.