Hörður Arnarson, forstjóri Landsvirkjunar, var tekjuhæsti forstjóri ríkisfyrirtækja í fyrra samkvæmt Tekjublaði Frjálsrar verslunar. Tekjur hans á mánuði námu að jafnaði tæplega 4,6 milljónum króna á mánuði á síðasta ári samanborið við 4,2 árið 2023.
Í öðru sæti á listanum er Runólfur Pálsson, forstjóri Landspítalans. Samkvæmt Tekjublaðinu var hann reyndar með 7,2 milljónir í tekur en Runólfur hefur upplýst að háar tekjur megi rekja til þess að hann hafi tekið út séreignasparnað í fyrra en hann er útsvarsskyldur og reiknast því sem tekjur í skattskrám Skattsins, sem upplýsingar Tekjublaðsins byggja á. Runólfur hefur upplýst að mánaðartekjur hans hjá spítalanum hafi numið um 4,5 milljónum króna.
Óskar Jósefsson, forstjóri Framkvæmdasýslunnar – Ríkiseigna (FSRE), var með tæplega 4,4 milljónir á mánuði í fyrra en hann tók við starfinu árið 2023. Guðlaug Rakel Guðjónsdóttir, forstjóri Heilbrigðisstofnunar Suðurnesja, var með 4,3 milljónir á mánaðarlaun í fyrra en hún var skipuð í loks árs 2023.
Sveinbjörn Indriðason, forstjóri Isavia, var með tæplega 3,9 milljónir á mánuði í fyrra og Guðmundur Ingi Ásmundsson, forstjóri Landsnets, var með tæplega 3,7 milljónir.
Vegna útgáfu Tekjublaðsins er nauðsynlegt að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Miðað er við útsvarsstofn samkvæmt álagningarskrá. Í tölunum eru ekki fjármagnstekjur, t.d. af vöxtum, arði eða sölu hlutabréfa. Hafa verður í huga að inni í tekjum getur verið einskiptisgreiðsla vegna úttektar á séreignasparnaði hjá lífeyrissjóði.
Hægt er að kaupa Tekjublaðið í forsölu hér. Að auki er blaðið til sölu í öllum helstu verslunum landsins.
