Sá sem þetta skrifar er enn að jafna sig eftir lestur greinar Ásthildar Lóu Þórsdóttur, þingmanns Flokks fólksins, og Ragnars Þórs Ingólfssonar, formanns VR, sem birtist á Vísi á mánudag. Ekki var hægt að verjast hugsuninni hvort greinarhöfundum væri yfirhöfuð sjálfrátt.
Grein þeirra telur um sex þúsund orð en það er á við sæmilega metnaðarlitla B.A.-ritgerð í stjórnmálafræði við Háskóla Íslands. Þar er hvorki meira né minna en kallað eftir afsögn Ásgeirs Jónssonar seðlabankastjóra og varað við því að skipunartími hans verði framlengdur um fimm ár síðar í vetur.
Þetta er svo rökstutt með ruglingslegu þvaðri í bland við delluhugmyndir í hagfræði. Gert að því skóna að þeir sem fara með stjórn peningamála í Seðlabankanum séu „heimskir“ eða bara hreinlega „illa innrættir“ og sekir um „grímulausa spillingu“.
Og svo að lokum hvetja riddararnir sjónumhryggu landsmenn alla til að hitta á sig á Austurvelli næstkomandi laugardag þar sem öllu heimsins óréttlæti verður mótmælt að ógleymdri verðtryggingunni.
***
Áður en lengra er haldið er rétt að taka fram að Seðlabanki Íslands er ekki hafinn yfir gagnrýni og sjálfsagt kunna menn að hafa skiptar skoðanir á framkvæmd peningastefnunnar hverju sinni. Að sama skapi er það sjálfsagt meira en einnar messu virði að ræða hvort verðbólgumarkmið sé endilega hinn hentugi rammi fyrir íslenska peningamálastefnu.
Það breytir hins vegar ekki þeirri staðreynd að Seðlabankinn starfar eftir lögum og reglum sem gerir að verkum að Taylor-reglan (kennd við John Taylor en ekki Roger svo því sé haldið til haga) ræður mestu um ákvörðun vaxtastigs í landinu á hverjum tíma. Vafalaust fylgja ákveðin blæbrigði stjórnendum bankans á hverjum tíma en þau hafa ekki mótandi áhrif á framkvæmd peningamálastefnunnar.
***
En aftur að greininni. Innblástur hennar virðist fyrst og fremst vera opinn fundur í efnahags- og viðskiptanefnd Alþingis með Ásgeiri Jónssyni seðlabankastjóra og Rannveigu Sigurðardóttur varaseðlabankastjóra fyrir nokkrum vikum og svo ráðstefna Þjóðarspegilsins í Háskóla Íslands í síðustu viku.
Fjölmiðlarýni er einn af föstum dálkum Viðskiptablaðsins. Þessi birtist í heild sinni í blaðinu sem kom út 8. nóvember 2023.
