Frá því í ágúst í fyrra hefur hrein staða lífeyrissjóða í verðtryggðum ríkisbréfum og íbúðabréfum lækkað um 50 ma.kr. að markaðsvirði. Að nafnvirði hefur hún staðið í stað þrátt fyrir afborganir sem gefur til kynna að þeir hafa keypt verðtryggt undanfarið.
Lífeyrissjóðirnir virðast miða við ástandið framundan, m.a. skuldaniðurfellingar með þeim afleiðingum sem Seðlabankinn spáir, verðtryggingardóma og kjarasamningsgerð. Á síðastliðnum 18 mánuðum hafa sjóðirnir aukið nafnverðstöður sínar í óverðtryggðu hraðar en verðtryggðu, hvað íbúða- og ríkisbréf varðar. Á sama tíma hefur verðmæti óverðtryggðs hækkað hraðar en verðtryggðs. Á síðustu tveimur mánuðum hefur þessi þróun snúist við – sjóðirnir hafa keypt verðtryggt en losað óverðtryggt.
Í febrúar og mars juku þeir stöður sínar í íbúðabréfum um 5 ma.kr. að nafnvirði. Frá því í september árið 2012 til loka janúar síðastliðins lækkuðu þeir nánast samfellt hreina stöðu sína í verðtryggðu, úr 258 mö.kr. að nafnvirði í 238 ma.kr. Staðan hækkaði í 244 ma.kr. í lok síðasta mánaðar.
Að markaðsvirði hefur hrein staða lækkað. Horft yfir lengra tímabil sést að staðan hefur farið úr 490 mö.kr. í september 2012 í 429 ma.kr. í lok síðasta mánaðar. Á þessu tímabili lækkaði heildarvirði langra verðtryggðra bréfa. Til dæmis lækkaði 10 ára verðtryggð skuldabréfavísitala Kauphallarinnar um 1% samkvæmt KODIAK Excel. Þá juku sjóðirnir nafnverðsstöðu sína um 25 ma.kr. í löngum óverðtryggðum ríkisbréfum á tímabilinu. 10 ára óverðtryggða vísitalan hækkaði um 11% á tímabilinu samkvæmt KODIAK Excel.
Vafalaust kemur það fæstum á óvart að sjóðirnir halda áfram að bæta við sig í HFF44 enda þótt ávöxtunarkrafa flokksins var á bilinu 3,01 til 3,35% í febrúar og mars - og þar af leiðandi undir 3,50% endurmatskröfu. Þar spilar inn í að verðbótahröðun HFF44 er 1,1 sinnum HFF34, 1,4 sinnum RIKS21 og 1,5 sinnum HFF24. [BOO1]
Það gefur hugsanlega lesendum einhverjar vísbendingar um hugarheim sjóðanna að þeir kjósa að auka við sig í HFF44 á meðan þeir minnka við sig í RIKB31, sem gefur jákvætt endurmat því ávöxtunarkrafa þess flokks var á bilinu 6,83 til 7,07% en endurmatskrafa 6,09%.
Fyrir þá sem hafa áhuga á fjárfestingum lífeyrissjóða í verðtryggða vaxtarófinu og tryggingafræðilegri stöðu þeirra er mælt með hagnýtum fyrirlestri Dr. Hersis Sigurgeirssonar í Seðlabankanum þann 29. apríl næstkomandi. Þar skoðar hann hvernig lögun vaxtarófsins tekur mið af lögbundinni uppgjörsaðferð lífeyrissjóðanna.
Hagsmunaárekstrar: höfundur á RIKS21 og vill biðja lesanda að taka tillit til þess við túlkun greinarinnar þótt hlutleysis hafi verið gætt.
Grein Brynjars birtist í Viðskiptablaðinu 25. apríl 2014. Áskrifendur geta nálgast pdf-útgáfu af blaðinu með því að smella á hlekkinn Tölublöð .
